Ang programa sa gobyerno nga Balik Probinsya, Bagong Pag-asa (BP2) walay hunong sa pagtabang sa katawhang Pilipino kung diin lain na usab nga benepisyaryo ang nakapahimus sa mga tabang ubos niining programaha.

Si Eduardo Acidera Pacite, 51 anyos og kinamagwangan sa unom nilang manigsuon usa lamang sa labing daghan nang natabangan sa BP2 program.

Si Pacite gipanganak og nitungha sa elementary ug highschool ngadto sa Manila apan nibalhin siya sa Cebu kung diin nisulod siya sa seminaryo aron magpari apan kini nga damgo wala mahinayon.

Ni eskwela siya og kolehiyo kung diin nakahuman siya sa kursong Psychology.

Matod ni Pacite, dakong tabang ang iyang mga ginikanan sa paghuman sa iyang pagtungha kung diin nahitabo kini pinaagi sa panikay-sikay sa iyang amahan isip construction worker.

Pagkahuman sa kolehiyo, mitrabaho si Pacite pinaagi sa pagtudlo sa usa ka pribadong tunghaan sa probinsya sa Cebu kung diin iyang unang nakita ug nailhan ang iyang napangasawa nga si Carmela.

Ang magtiayon mi desisyon nga mopuyo sa Manila aron ngadto ipadayun ang ilang panginabuhi. Didto usab sa Manila nahimugso ang ilang upat ka mga anak. Gibuhi ni Eduardo ang iyang pamilya pinaagi sa iyang pagtudlo sa pribadong eskwelahan ug nisulod sa usa ka “networking” aron makakita og laing income.

Apan sa wala damha, nahunong sa iyang pagpanarbaho si Eduardo niadtong tuig 2017 kung diin naglisod na siya og pagpangita og laing matang sa panginabuhi mahitungod sa iyang edad. Kini nag resulta ngadto sa pinansyal nga kalisod nga nasinati sa iyang tibuok pamilya og tungod niini mi desisyon ang iyang asawa nga si Carmela nga mobalik sa Cebu kuyog ang ilang duha ka anak.

Mahitungod niining sitwasyon, si Eduardo nag-inusara nga mibuhi sa nahabilin niyang duha ka mga anak kung diin mitrabaho siya isip drayber sa Quezon City kini aron mahatag ang mga panginahanglan sa iyang mga anak.

Apan lain na usab nga problema ang niabot sa iyang kinabuhi kini human gipatuman ang lockdown mahitungod sa pandemyang dala sa COVID-19 kung diin nahunong na usab sa iyang panginabuhi isip drayber si Eduardo. Dinhi nga panahon, naka desisyon siya nga mouli nalang sa Cebu aron makauban ang iyang asawa og laing duha ka mga anak, apan tungod sa kakuwang sa kwarta wala maka larga si Eduardo sa Cebu.

Kini nga sitwasyon sa iyang kinabuhi maoy midala ni Eduardo ngadto sa paninguha nga mahimung benepisyaryo ubos sa programang Balik Probinsya, Bagong Pag-asa nga gipatuman karon sa gobyerno.

“Pag announce ni President Duterte sa TV, interesado na gyud ko and then nag apply ko sa online ug dayun nag huwat ko sa ilang response, ni apply ko pag 2020 og pag 2021 naa nay nanawag nga mag interview og pag January 2022, gi-ingnan nako nila nga by April or May nay possibility nga ma dispatch nami,” kini matod ni Pacite sa iyang pagpaambit kung giunsa niya pag-apply sa maong programa.

Niadtong Hunyo 2, pinaagi sa BP2 program natuman ang paninguha ni Eduardo nga makabalik sa Cebu kuyog ang iyang duha ka mga anak nga si Edwin, 20 anyos, ug Maria Divina Clara, 19 anyos, kung diin apil sila sa 16 ka nga indibidwal nga miuli sa probinsya aron mosugod ug bag-ong panginabuhi kauban ang ilang mga pamilya.

Sa ilang pag-uli dinhi sa Cebu, ang duha ka mga anak ni Eduardo mipadayag sa ilang gibati karon nga magkakuyog na sila sa ilang tibuok pamilya.

Ang pamilya ni Eduardo magpuyo na karon kuyog ang iyang asawa ug upat ka anak sa Brgy. Labangon, Cebu City kung diin nagplano sila nga magtukod og usa ka sari-sari store isip panginabuhi sa ilang pagpuyo dinhi sa probinsya.

Isip benepisyaryo sa BP2 programa makadawat usab ang ilang pamilya og mga assistance gikan sa mga kaubang ahensya nga nagdumala sa implementasyon sa nahisgotang programa.

Si Eduardo nanghinaot nga mao na kini ang sinugdaan sa kausaban ug kalambuan sa ilang kinabuhi isip usa ka pamilya pinaagi sa mga tabang og benepisyo nga ilang madawat.

Gidayeg ug gipasalamatan usab niya ang hinungdan sa pagkamugna sa maong programa nga padayung nitabang karon sa mga nagkinahanglan, walay lain kundi ang presidente sa nasud, President Rodrigo Roa Duterte. (RGC/PIA7)