PUERTO PRINCESA, Palawan (PIA) -- Isinagawa ang weaving fishing net training o pagtahi ng lambat para sa  ilang miminim security inmates ng Iwahig Prison and Penal Farm sa Puerto Princesa City kamakailan.

Sa panayam ng PIA-Palawan kay Correction Technical Officer II at IPPF spokesperson Levi Evanglista, sinabi niya na  isa lamang ito sa mga  ‘reformation program’ ng ahensiya  sa  pamumuno ni IPPF Chief Superintendent Joel Calvelo.

"Napakalahaga  nito sa ating mga Person Deprived of Liberty (PDL)  kasi nalilibang sila sa mga ganitong proyekto,  na kahit maliit lang ay lumilipas ang kanilang oras para  sa mga  makabuluhang bagay," ani Evangelista.

Aniya, habang nakapiit pa, magagamit lamang ng mga pdl  ang kanilang mga lambat sa panghuhuli ng isda sa mga fish pond na ginawa ng IPPF, ito ay  para matiyak na hindi sila tatakas at maging ang kanilang seguridad.

Ayon pa kay Evangelista, ginawa nila ang ganitong pagsasanay para ihanda  ang mga  PDL dahil  kung sakaling sila ay makalaya na sa piitan ay magagamit nila ang kanilang natutunan sa kanilang pamumuhay sa komunidad.

Samantala, nagsilbing tagapagsanay naman ng mga partispante ang isang PDL na may talento sa pagtahi ng lambat, habang ang mga kagamitan tulad ng nylon at iba pa ay sinagot ng IPPF.

Ang mga PDL na nasa miminum security compound ay kuwalipikado nang mabigyan ng parole kung maaabot at makumpleto nila ang mga dapat na tuparin para tuluyan na silang makalaya.(MCE/PIA Mimaropa)