TAGBILARAN CITY, Bohol, July 8 (PIA) -- Taliwala sa nagpabilin nga pagtuo nga ang coronavirus disease (COVID) usa lamang ka ilad, gitala sa Bohol ang ika lima nga namatay sa sakit sa buwan sa Hulyo ug ika 84 nga kamatayon sukad nakadagsang ang sakit dinhi.

Niini nga una nga semana pa lamang, ang trend sa lima nga nangamatay, kon magpadayon ug dili masumpo, mahimong magdala sa labing makahahadlok nga talimad-on.

Ang trend nagpakita nga sa lima ka namatay sa unang walo ka adlaw, daku ang posibilidad nga maapsan pa ang 22 ka nangamatay sa milabay nga buwan sa Hunyo lamang.

Ang 84 nga kinabuhi nga nakalas sa sakit, sama sa giingon, namatay sa komplikasyon nga dala sa COVID-19 sama sa pneumonia, sakit sa kasingkasing, sakit sa ginhawaan, ug uban pang komplikasyon .

Ang COVID-19 dala sa kagaw nga maoy hinungdan sa grabe nga sakit sa ginhawaan, nga kasagaran maoy atakehon hinungdan sa kamatayon sa usa  ka tawo nga masudlan niini.

Kini samtang gitaho sa mga mayor sa Bohol nga nagkausab na ang baruganan sa mga kaniadto, nagdumili sa pagpabakuna.

Hinuon, ang bag-ong kasayuran nga ikalipay na unta sa mga naningkamot nga mabuntog na ang sakit pinaagi sa pagpabakuna, laing suliran ang mitumaw ug kana mao ang kakuwang sa ming-abut nga bakuna.

Sa pagpakighinabi, gibutyag ni Tubigon Mayor William Jao nga na-usob na ang hunahuna sa mga tawo ug karon nga buot na nga mabakunahan, ang supply na hinuon pod sa bakuna ang nahimong suliran.

Kini usab gidasonan nila ni Loay Mayor Hilario Ayuban, kinsa personal nga nangampanya aron magpabakuna na ang iyang katawhan aron mahibalik na ang normal nga patigayon sa lungsod.

Si City Mayor John Geesnell Yap, lakip na ang mga tinugynanan sa kasanihan nagtuo nga kon anaa lamang ang kasaligan nga tinubdan sa bakuna, mas daghan na ang naabut sa pagpamakuna.

Dugang sa batan-on nga mayor sa syudad nga aduna pa usab trend nga namatikdan ug kana  mao ang pagpili sa mga Western nga bakuna.

Niini, mipalanog ang Department of Health nga ang tanan nga bakuna nga nahatagan og emergency use authority sa Food and Drugs Administration (FDA) garantisado gayud nga epektibo ilabi na sa paglikay sa matupokan niini sa pagkagrabe ngadto na sa pagkamatay.  

Matud sa mayor, daghang nangahadlok magpabakuna kay kuno mamatay o may mga side effects.  

Apan, gipadayag sa mayor nga sa  ka daghan na nga nabakunahan, ang uban gani, nahuman na sa ilang ikaduha nga dose, wala pay nabalita nga namatay tungod sa pagpabakuna.

Sa hisgutanan sa side effects, matud pa sa datus sa DOH, wala pay napa-ospital tungod sa grabe nga adverse reactions sa bakuna.

Gani, mas daghan na ang namatay nga wala magpabakuna. (RAHC/PIA7 Bohol)