TAGBILARAN City, Bohol, July 9 (PIA) -- Gitugotan sa Government’s Pandemic Task Force ang Local Government Units, nga mangayo gihapon og negatibo nga RT-PCR sa Coronavirus Disease (Covid-19) nga test sa mga indibidwal nga naka kompleto na sa bakuna, ug kon dili makahatag niini, mahimong dili kini tugutan nga makasulod sa ilang tagsa-tagsa ka lugar padulngan, matod sa Department of Health (DOH)

Subay usab niini, mahimo usab hinuon nga Vaccination Card lamang, ug base sa adlaw sa pag-isyu sa Vaccination Card nga mao ang panghimatuod o validation niini.

Dugang ni Kalihim Francisco Duque III, ang Department of Information and Communication Technology (DICT), naggama na og Digital Vaccine Certification ug mipasalig nga sa Hulyo 31 ma-upload na ang 90 percent nga katubuk-ang nabakunahan nga indibiwal sa nasud.

Ang Inter-Agency Task Force, una nga nagpagawas og usa ka resolusyon, diin gipagaan ang mga kinahanglanon nga dokumento sa pagbiyahe alang sa mga bakunado nga indibidwal sulod sa nasud.

Bisan pa, ang pipila ka mga LGUs nagpahayag sa ilang pagduha-duha sa pagtugot sa mga Vaccination Card isip igo na nga alternatibo sa mga panginahanglanon sa test, dala sa nagkadaghan pa nga pagtakod sa makamatay nga sakit. (RAHC/PIA7 Bohol/Ruffa Mae F. Evardo)