TAGBILARAN CITY, Bohol, July 19 (PIA) -- Nikabat na sa kinatibuk-ang 109,746 ka residente sa lalawigan sa Bohol ang ‘fully vaccinated’ na batok sa coronavirus disease (COVID-19), base sa datos sa kagamhanang probinsyal.
Niining numero, 76,269 ang nakadawat na sa unang dose, samtang 33,477 ang nahatagan na sa ikaduhang dose.
Base sa COVID-19 vaccination report sa Provincial Heath Office, may 60,896 ka health workers, 30,159 ka senior citizens, 12,755 persons with comorbidities ug 5,936 essential workers ang naka-kumpleto na sa duha ka dose nga bakuna sukad Hulyo 14.
May kinatibuk-ang 145, 312 ka mga bakuna nga gilangkoban sa Sinovac, Aztrazeneca, Pfizer ug Sputnik V ang nadawat sa lalawigan.
Ang lalawigan sa Bohol may kinatibuk-ang 8,726 ka kaso sa COVID-19 diin 237 niini ang bag-ong kaso, 1,370 ang kinatibuk-ang aktibong kaso, 7,236 ang nangaayo na samtang 120 na ang nangamatay sukad nikuyanap ang pandemya sa niaging tuig. (ECB/PIA7 Bohol)
Pipila sa mga senior citizen sa syudad sa Tagbilaran ang nakadawat na sa ilang ikaduhang dose sa COVID-19 vaccine sa Tagbilaran City College, usa sa mga vaccination center sa syudad. (ECB/PIA7 Bohol)
