ILOILO CITY(PIA) - - Temporaryo nga ginpalip-ot ang business hours sang mga sanga sang Social Security System (SSS) nga nahamtang sa syudad sang Iloilo may kaangtanan sa implementasyon sang Enhanced Community Quarantine (ECQ) sa syudad kag probinsya sang Iloilo.

Ginpahayag ni Amiel Genova, Acting Senior Communication Analyst sang SSS-West Visayas 2, nga ginsuguran implementar sang SSS Iloilo Central Branch kag Iloilo Molo Branch ang skeletal workforce kag ginpalip-ot nga working hours sang Lunes, Hulyo 19.

Suno kay Genova, ini ang pagsunod sa Executive Order No. 61 kag Executive Order No. 258 nga ginpaguwa nanday Iloilo City Mayor Jerry Trenas kag Gobernador Arthur Defensor may kaangtanan sa pagpatuman sang ECQ sa syudad kag probinsya sang Iloilo tubtub sa Hulyo 31, 2021.

Nagasugod ang business hours sa sini nga mga sanga halin alas 8:00 sa aga tubtub alas 3 sa hapon sa ila Member Services Section kag alas 8 sa aga tubtub alas 2 sa hapon sa ila Tellering Section.

Gindugang niya nga yadtong may mga kumpirmado nga appointment pinaagi sa ila hotline kag online appointment system ang ila gina-akomodar sa karon.

Suno pa sa iya nga ginapahanugutan ang walk in clients sa tellering section para sa bayad sa kontribusyon kag loan nga nagasunod sa istrikto nga pagsulundan sa quarantine kasubong sang social distancing kag pagsuksok sang facemask kag faceshield sa tanan nga oras.

Sa dugang nga palamangkutanon, mahimo ini ipadala sang miyembro pinaagi sa email nga iloilo@sss.gov.ph ukon magtawag sa mga masunod nga hotline numbers: (033) 509-9828; (033) 338-1307; (033) 336-7814; 09366341607. (laf/PIA6 -Iloilo)