TAGBILARAN CITY, Bohol, July 24 (PIA) -- Ming-abot na sa 1,452,813 ang kinatibuk-ang natala sa mga naayo sa coronavirus disease 2019 (COVID-19) sa nasud matud sa Department of Health (DOH).

Kini tungod sa mga bag-ong natala nga 3,257 ka mga naayo sa COVID-19, segun sa taho niadtong Huwebes, Hulyo 22.

Matod sa DOH, ang maong numero katumbas sa 94.9 percent recovery rate gikan sa kinatibuk-an nga 1,530,266 nga mga impeksyon sukad sa pagsugod sa pandemya sa miaging tuig.

Ang DOH usab nakatala og 5,828 ka mga compirmadong kaso nga nagdala sa kinatibuk-ang ihap ngadto na sa 50,562 ka mga aktibong kaso sa nasud.

Sa mga nag-aktibong kaso, 92.7 percent niini ang mild, 1.6 percent ang mga wala’y simtomas, 2.5 percent ang mga severe, 1.74 percent ang moderate, ug 1.5 percent ang anaa sa kritikal nga kondisyon.

Dugang usab sa DOH, adunay 17 ka mga bag-ong namatay sa COVID-19 nga nagpataas sa kinatibuk-ang namatay ngadto na sa 26,891. (RAHC/PIA7 Bohol/John Paul Elicano)