TAGBILARAN CITY, Bohol, July 26 (PIA) -- Nakatala ang Department of Health (DOH)  og 55 ka bag-ong kaso sa Delta Variant sa Coronavirus Disease (Covid-19) sa nasud.

Sa kinatibuk-an, anaa sa 37 ang gikonsidera nga mga lokal transmission,17 ka mga Returning Overseas Filipino (ROF), samtang ang usa karon padayung gisuta kung usa ka local o kaso nga dala sa ROF, butyag sa DOH.

Niini, usa ka kaso ang nabutyag nga namatay samtang ang 54 nga kaso natala nga naayu na, diin kini naghatud sa total nga kaso sa Delta Variant nga anaa na sa 119.

Gipahayag sa DOH nga sa 37 nga mga lokal nga kaso, 14 ang gikan sa Calabarzon (Cavite, Laguna, Batangas, Rizal, Quezon), 8 gikan sa Northern Mindanao, 6 ang nabutyag sa National Capital Region (NCR), ug 6 sa Central Luzon,  2 ang Davao Region, ug anaa sa usa gikan sa Ilocos Region.

Niini, padayon’g gi-awhag  sa DOH ang publiko nga kung makasinati na kini sa mga simtomas sa Covid-19  mas mahinugdanong mopahibalo sa ilang Barangay Health Emergency Response Teams ug labot kadtong mga nakadu-ol ug nakauban nga mahimong natakdan na, matumbok ug matesting aron dili na makalanat pa ang virus.

Sa kasamtangan, 94 ka kaso sa Alpha Variant ang natala, anaa sa 179 ka kaso sa Beta, ug 9 ka kaso sa P.3 Variant .

Niini, ang kinatibuk-ang kaso sa Alpha Variant anaa sa 1,775, diin ang Beta Variant anaa sa 2,019 , ug 244 ang natala sa P.3 variant, samtang ang Gamma Variant adunay 2 ka kaso ang nadiskobre. (RAHC/PIA7 Bohol/Mae Ann Grace C. Rubia)