TAGBILARAN CITY, Bohol, July 25 (PIA) -- Nakasiguro ang Pilipinas nga adunay makanunayong suplay sa mga bakuna sa sunod nga 6 ka mga bulan.

Kini kay nagsiguro ang nasudnong kagamhanan sa 164 million doses sa mga bakuna pinaagi sa pagpamalit samtang nagla-um ug pa kini og dugang nga mga shots gikan sa COVAX Facility ug mga donasyon.

Kini ang gipasalig ni National Task Force (NTF) against COVID-19 Chairperson, Secretary Delfin Lorenzana ug NTF Chief Implementer and vaccine czar, Secretary Carlito Galvez Jr. panahon sa Pre-Senate of the Nation (SONA) Forum nga gitambongan sa mga member-agencies sa Security, Justice, and Peace Cluster niadtong Miyerkules.

Matod ni Lorenzana, naghuwat na lamang sila karon nga ihatod ang 136.1 million nga dugang nga mga bakuna.

Dugang pa sa kalihim, sa pagsubay sa gipatuman nga programa sa pagbakuna, naglaum ang mga tinugyanan sa labing maayo nga pasko niining tuiga.

Ingon sa natala sa Hulyo 21, kinatibuk-ang 28,485,130 ka mga dosis ang nahatod na sulod sa 164 million doses nga ge-angkat sa nasud.

Sulod niining nahatod, labaw sa 16 million doses ang pinalit sa goberno, 2.2 million ang pinalit sa pribadong sektor ug local government units (LGUs) 10.2 million doses nga donasyon gikan sa COVAX facility.

Lain nga 2.1 million doses usab ang gikan sa mga bilateral donations.

Ang 164 million doses nga nahisgutan, gilangkoban sa 26 million Sinovac doses nga gipalit sa goberno, 40 million Pfizer-BioNTech doses, 13 million Moderna doses, ug 10 million Sputnik V doses. (RAHC/PIA7 Bohol/Analyn Y. Socobos)