TAGBILARAN CITY, Bohol, July 27 (PIA) -- Miabot niadtong Lunes sa gabii, ang labing bag-o nga batch sa mga bakuna nga Pfizer BioNTEch  nga nakuha sa gobyerno.

Ug kining mga bag-ong nangabut nga bakuna ipadala sa mga probinsiya kinsa mao nay maghimo sa pagdumala sa mga jabs nga nanginahanglan og temperature sa Ultra cold temperature freezer, ingon pa sa usa ka sa Health Official.

Ang katibuk-ang 375,570 mga doses sa Pfizer BioNTech nga ginama sa Estados Unidos miabot sa Ninoy Aquino International Airport, Terminal 3 sa Pasay, ug kini ang ikaduhang pagdeliver sa 40 milyones ka doses sa bakuna sa Pfizer nga gipalit sa Gobyerno.

Ang una nga pagpadala sa gipalit nga bakuna nga Pfizer, may sulud nga 562,770 ka doses, una na nga  miabut niadtong Hulyo 21.

Ang eroplano nga Air Hongkong, nga nagdala sa kargamento nga unang ning-landing sa Cebu-Mactan International Airport sa Dakbayan sa Lapu-Lapu, Cebu kaniadtong Lunes sa alas 6:23 sa gabii, aron ibilin na ang mga bakuna nga alang sa mga rehiyon nga duol sa Sugbo. 

Karong Martes, gilauman nga makadawat ang Davao Region sa ilang dugang nga doses sa bag-ong nangabut nga bakuna. (RAHC/PIA7 Bohol/Ruffa Mae F. Evardo)