LUNGSOD NG LUCENA, Quezon (PIA) --Isinailalim sa Ehance Comunity Quarantine (ECQ) simula Agosto 30 hanggang sa Setyembre 13 ang buong isla ng Jomalig, Quezon.

Ang pagpapatupad ng ECQ sa nasabing isla ay base sa rekomendasyon ni Municipal Health Officer (MHO) Dr. Paulo A. Remudaro dahil sa patuloy na pagtaas ng bilang ng kaso ng COVID-19.

Ang rekomendasyon ay inihayag ni Dr. Remudaro sa isinagawang pagpupulong ng municipal IATF Agosto 26 na pinangunahan ni Mayor Rodel T. Espiritu bunga ng pagdami ng positibong kaso ng COVID-19 sa nakaraang tatlong linggo.

Mula sa rekomendasyong ito, sinang-ayunan at pinagtibay ng lahat na bumubuo ng municipal IATF ang pagsasailalim sa ECQ ng buong isla ng Jomalig simula Agosto 30 hanggang Setyembre 13.

Kabilang din sa rekomendasyon ni Dr. Remudaro na tatanggapin muna sa rural health unit (RHU) ang mga severe cases habang ang mga mild cases naman ay sasailalim sa home quarantine. Ito ay base sa dami ng bilang ng nagpositibo na mild at severe cases kung saan bibigyan ng prayoridad na maipasok sa isolation facility ang mga severe cases.

Pinaalalahanan din ang lahat na sumunod sa nilalaman ng batas ukol sa ECQ na ipatutupad tulad ng oras, sino at kung ano ang mga kailangang dokumento para makalabas ng kanilang tahanan.

Patuloy din ang pagpapa-alala sa mga residente na sumunod sa health protocol tulad ng paghuhugas ng kamay, pagsusuot ng face mask at practice ng social distancing.

Maliban kay Mayor Espiritu at Dr. Remudaro, kasama rin sa pagpupulong sina Oscar Espiritu kinatawan ng DILG, PNP Jomalig Police Exeucitve Master Sgt. Edmar Fabricante at iba pang miyembro ng municipal IATF.

Samantala, ini-ulat ng Jomalig RHU ang pagdating kahapon, Agosto 30, ng 1,260 doses ng Sinovac mula sa Lungsod ng Lucena na inilaan para sa priority group A4, ang economic frontliners.

Nakatakda ang pagbabakuna sa A4 sa Agsoto 31 hanggang Setyembre 3 ngunit dahil ECQ sa buong isla, ang mga nakaraang nakalista lamang muna ang uunahing mabakunahan at hindi tatanggap ng walk-in. (CPC, PIA Quezon at ulat mula sa LGU Jomalig FB Page)