LUNGSOD NG CALAPAN, Oriental Mindoro (PIA) -- Bilang pagdiriwang ng Consumer Welfare Month ngayong buwan ng Oktubre na may temang; ‘Digital Consumers: New Normal,’ kasabay ng National Standards Week, nagsagawa ng product standards monitoring ang Department of Trade and Industry (DTI) Oriental Mindoro sa mga merkado kasabay ng taunang pag wasak sa mga produktong substandard na ginanap sa Eco Park, Brgy. Balatero, Puerto Galera kamakailan.

Ayon kay DTI Provincial Director Arnel Hutalla, “ang mga produktong wawasakin ay nanggaling sa mga establisyimento na nagtitinda ng mga PVC pipes gayundin ang mga walang brand na inidoro na hindi dumaan sa tamang proseso at walang tatak ng ‘PS Mark’ o ICC sticker sa bawat produkto.”

Dahil wala itong mga tatak at hindi sertipikadong gamitin ay hindi pinapahintulutan na ibenta sa merkado na siyang maaaring magdulot ng peligro sa buhay at mga ari-arian sa panahon na gamitin ito ng mga mamimili.

Samantala, matapos ipagbigay alam ng DTI sa pamahalaang lokal ng Puerto Galera ang mga nakumpiskang kagamitan, hiniling ng tanggapan ng Municipal Environment and Natural Resources (MENRO) na pinamumunuan ni MENRO Joan Margarette Yap na ang mga nakumpiskang tubo ay ipagkaloob na lamang sa kanila upang magamit sa Eco Park na siyang maaring maging palamuti para sa ikagaganda ng lugar.