TAGBILARAN CITY, Bohol, Nov. 12 (PIA) -- Anaa na sa 27.68% ang mga fully vaccinated sa Bohol batok sa coronavirus disease (COVID-19), segun sa taho sa Kagamhanang Probinsyal niadtong Nobyembre 10, 2021.

Sa taho sa kagamhanang Probinsyal nag gipaambit sa Bohol Inter Agency Task Force (BIATF) on the Management of Emerging Infectious Disease (BIATF), 266,340 na ka mga Bol-anon ang nahatagan sa tag duha  ka tupokan sa bakuna nga mag-andam sa lawas aron makapanalipud na kini sa pag asdang sa kagaw.

Hinuon, ang 27.86% nga ihap, segun sa masterlist nga gitakda sa lalawigan nga 961,871.

Tumong sa mga tinugyanan sa kasanihan sa kagamhanan, kinahanglang abton ang labing menos 70% nga manakuhahan batok sa COVID-19. 

Matud pa sa mga tinubdan sa Bohol Emergency Operations Center, ang masterlist hinuon, mahimo pa nga masibog.

Subay sa labing bag-o nga census sa Philippine Statistics Authority, mi-abut na sa 1,394,329, ug  ang 70% niini, anaa sa 976,030.

Sa sama nga taho, giingon usab nga ang mga Bol-anon nga nakakuha na sa unang tupokan sa bakuna, moabut na sa 291,299 o 30% sa kinatibuk-ang masterlisted nga populasyon sa Bohol.

Segun sa tigpamaba sa BIATF, Dr. Cesar Tomas Lopez, kon maabut na sa 30% sa kinatibuk-ang populasyon ang maabut sa bakuna, masinati na ang pag-level off na sa mga kaso diin magpundo na ang ihap sa mga masakit, wala nay madugang sa bag-ong kaso.

Dugang niya, kon anaa na sa 50% sa kinatibuk-ang populasyon ang mabakunahan, masinati na ang hinay nga pag-ubos sa mga bag-ong kaso, ug pagdahhans a mga makarecover sa sakit.

Kon makab-ot na ang 70% nga mabakunahan sa us aka lugar, dinhi magsugod na og kawala ang mga bag-ong kaso ngadto sa hingpit na nga pagkawala niini.

Sa kasamtangan, ang Bohol nakatupok na sa 557,639 ka doses sa bakuna.

Kasamtangan na usab nga may nadawat nga 856,912 ka doses sa bakuna  sukad niadtong Marso 6 kanus-a, unang nahidangat dinhi ang unang delivery sa bakuna gikan sa nasudnong kagamhanan.   

Aduna pay 299 mil ka doses sa bakuna nga gitipigan sa Bohol Provincial Vaccination Operations Center ug iyang magamit sa sunod nga mga adlaw aron ikapamakuna, samtang nagsugod na ang pagpamakuna sa mga 12 ngadto sa 17 anyos dinhi. (RAHC/PIA-7 Bohol)