PUERTO PRINCESA, Palawan (PIA) -- Tinatayang nasa anim na lang at watak-watak na ang natitirang mga miyembro na may mataas na katungkulan ng Communist Terrorist Group sa Palawan matapos ang naganap na engkwentro sa pagitan ng militar at ng nasabing grupo noong hapon ng Disyembre 10 sa Sitio Bayugon, Bgy. Tinitian, Roxas, Palawan.

Ito ang sinabi ni Col. Jimmy D. Larida PN (M)(GSC), Commander ng Philippine Marines-3rd Marine Brigade sa isinagawang press conference nitong Disyembre 11 ng hapon sa Marine Base Rodolfo Punsalang, kung saan iprinisenta sa Palawan media ang mga narekober na mga matataas na kalibre ng baril, iba pang mga gamit pandigma, pagkain at personal na gamit ng mga CTG.

Sa nasabing engkwentro, walang naiulat na nasaktan sa panig ng militar ngunit ikinalulungkot ng pamunuan ng 3rd Marine Brigade at ng Western Command (WESCOM) ang pagkakamatay ng isang miyembro ng pinaghihinalaang miyembro ng CTG na kinilalang si Arimel Padilla Rodriguez alyas Azumi, Red at Singko.

Hinikayat naman ni Col Larida, ang natitira pang miyembro ng CTG sa Palawan na sumuko na sa pamahalaan upang matulungan ang mga ito na makabalik sa main stream ng society, lalo na ngayong nalalapit na ang Pasko.

“Paulit-ulit nating iniimbitahan ang mga kapatid natin na communist terrorists na sumuko na sa gobyerno at handang-handa ang mga Local Government Units ng Palawan (LGU), partikular ang Palawan Provincial Task Force-ELCAC upang tanggapin ang mga ito at maisama na ma-enroll sila sa Enhanced Comprehensive Local Integration Program (E-CLIP) at tulungan silang makabalik sa main stream ng society, lalo na ngayon na ilang araw na lang ay Pasko na. Kagaya rin natin ‘yong mga CTGs, kagaya rin natin na may mga mahal sa buhay na nag-aabang ng mainit yakap na nag-aaantay sa kanila ngayong kapaskuhan,” ang pahayag ni Col. Larida.

Tiniyak din ni Larida na mabibigyan ng maayos na burol at libing ang namatay na miyembro ng CTG. Aniya, naiturn-over na ito sa Lokal na Pamahalaang Bayan ng Roxas, Palawan para sa tamang disposisyon.

Ilan sa mga High Powered Fire Arms na narekober ng militar sa nangyaring engkwentro kahapon na iprinisenta sa press conference ay ang mga sumusunod: 3-M16A1 Rifle, 3-M203 Grenade Launcher at 1-M14 Rifle.

Kasama rin dito ang 5-Bandoliers, iba't-ibang bala, anti-personel mines, mga notebook at ilang module para sa mga estudyante sa grade 10.

Sa dami ng mga kagamitang narekober ng militar sa lugar na nabanggit, tinatayang ito ay isa sa mga kampo ng CTG, ayon pa sa opisyal ng military. (OCJ/PIA-MIMAROPA, Palawan)