LUNGSOD NG QUEZON -- Bilang isa sa mga paghahanda sa darating na 2022 National and Local Elections, nagsagawa ng media briefing ang Commission on Elections (COMELEC) noong Biyernes, 11 February 2022 sa PTV Studio 4, Quezon City na dinaluhan ng mga government media personnel.

Ibinahagi ni COMELEC Spokesperson Dir. James Jimenez ang overview ng magiging proseso ng pagboto sa darating na May 9 elections sa gitna ng umiiral na pandemya.

Binigyang-diin niya na mananatiling in-person ang pagboto at ipapatupad pa rin ang Automated Election System (AES) na gagamitan ng manual ballots katulad ng mga nakaraang eleksyon.

Paalala ni Dir. Jimenez na i-check ng mabuti ang ibibigay na balota bago bumoto. Kung sakali mang may makikitang problema ay agad na ipaalam sa Board of Election Inspector (BEI) upang mapalitan. Dahil kapag nakapagsimula na at nagkamali sa pagboto ay hindi na papayagang palitan ang balota.

Dagdag pa niya ay siguraduhing maiingatan ang balota at huwag susulatan ang mga parte lalo na ang mga security markings ng balota upang maiwasang ma-invalidate o hindi tanggapin ng Vote Counting Machines (VCM) ang balota. Gayundin, tandaan na ang oval na kailangang i-shade ay bago ang pangalan ng nais iboto. Siguraduhing hindi mag-overvote upang mabilang ang boto.  Huwag ring kaliligtaan na bumoto ng Party-List na matatagpuan sa likurang bahagi ng balota.

Proseso ng pagboto sa Araw ng Eleksyon

Sa araw ng botohan, lahat ng boboto ay sasailalim sa Health Check gaya ng pagkuha ng temperature at screening kung nakakaranas ng sintomas ng COVID-19.

Kung walang sintomas, didiretso ang mga boboto sa Main Polling Area kung saan may mga Voter’s Assistance Desk para tumulong malaman kung saan ang assigned polling precinct ng boboto. Makakatanggap ng papel na mayroong pangalan, precinct assignment at sequence number o bilang sa listahan ng mga botante sa loob ng voting precinct. Matapos nito ay maaari nang dumiretso sa precinct assignment at magpakilala sa Board of Election Inspector (BEI) para makaboto.

Ang mga boboto naman na magpapakita ng sintomas at hinihinalang may COVID-19 ay papayagan pa ring makaboto subalit dadalhin sila sa designated na Isolation Polling Place (IPP). Bibigyan sila ng balota subalit kinakailangan nilang pumirma ng isang waiver na papayagan ang Board of Election Inspector (BEI) na dalhin ang kanyang balota sa orihinal na assigned polling precinct at siya ang maghuhulog ng balota sa Vote Counting Machines (VCM). Pagkatapos bumoto ay ire-refer ang botanteng suspected na may COVID-19 sa mga health official.

Maging ang mga boboto naman na madidiskubreng positibo sa COVID-19 ay papayagan pa ring makaboto at ire-refer sa health officials matapos bumoto .

Nilinaw rin ni Dir. Jimenez na walang hahanaping proof of vaccination o COVID-19 tests sa mga boboto.

“You don’t need to be vaccinated in order to vote. Vaccination is not a requirement for voting. Antigen testing or RT-PCR testing is not a requirement for voting either,” Dir. James Jimenez said.

Upang matiyak ang kaligtasan ng lahat ay mahigpit pa ring ipapatupad ang Minimum Public Health Protocols (MPHS) gaya ng pag-obserba sa physical distancing at pagsusuot ng facemask at face shield. (KSAA / DDCU)