LUNGSOD NG CALAPAN, Oriental Mindoro (PIA) -- Ipinagkaloob ng Department of Agriculture – Regional Field Office (DA-RFO) Mimaropa ang limang incubator na kabuuang halaga ng P195,000 para sa apat na samahan ng mga livestock raiser mula sa apat na bayan at sa Provincial Veterinary Learning and Extension Center (PVLEC) na ginanap sa Kapitolyo ng lalawigan kamakailan.

Ang isang incubator ay normal na naglalaman ng 352 itlog ng native na manok (depende din sa laki) upang ito’y magsilbing painitan hanggang sa pumisa ang mga sisiw sa loob ng 3-9 na araw. Maari din itong gamitin sa mga itlog ng pato, pabo, kalapati, pugo at iba pang alagain na nagingitlog upang mabilis itong pumisa.

Sa mensahe ni Provincial Veterinary Head Dr. Grimaldo Catapang, kayang sinabi na “Noong panahon ay nangarap din kami sa ProVet na ang Oriental Mindoro ay maging isang malaking producer ng itlog sa tulong ng mga livestock raiser. Sa kasalukuyan, ang ating lalawigan ay umaangkat ng 13 milyong itlog kada taon mula sa ibang lugar kaya malaking tulong itong mga incubator na ipinagkaloob ng DA upang matupad ang ating mga pangarap na sa hinaharap ay makakapagbenta na rin tayo ng mga itlog sa buong bansa.”

Dagdag pa ni Catapang, noong 2018-2019 ay namahagi ng mga sisiw sa mga bayan ang Pamahalaang Panlalawigan upang makatulong sa pagdami ng mga manok at makapagparami ng mga itlog na ibebenta sa merkado sa loob at labas ng Oriental Mindoro

Samanatala, nagpasalamat naman ang pangulo ng Naujan Animal Raisers Assn. (NARA) na si Petronila Valencia matapos tanggapin ang naturang aparato sa DA.

Aniya, “hindi lamang ang aming samahan ang maaring makinabang nito kundi ito’y para sa lahat ng mga samahan sa aming bayan na may mga alagang nangingitlog na hayop upang mapabilis ang pagpaparami ng kanilang mga alaga ng sa gayon ay makalikha din ng maraming itlog.”

Maliban sa NARA, pinagkalooban din ang  samahan ng Roxas Animal Raisers Assn. (RARA), Samahan ng Magsasaka, Magniniyog, Mangingisda at Maghahayupan (SAMMMMBU), Gloria Sustainable Agriculture Assn. (GLOSAA) at PVLEC. (DN/PIA-OrMin)