TUGUEGARAO CITY, Cagayan (PIA) - - Kavulu y minannigay ira o nu fisherfolk ta naafektan ta pattulu na presyo na gasolina, yatun ta y gobyernu ay nangiyalawa ta 6.5 million pesos nga fuel subsidy para ta minannigay ira na Rehiyon Dos, nekagi na Bureau of Fisheries and Aquatic Resources (BFAR) na rehiyon dos.

Kagitta na minakkusetsa ira, mawak tu mepay y ngaga-ngagan na minannigay ira ta Fisherfolk Registry, nga yayya ay masterlist na totolay nga parte na fishing industry, nga masservi tu referensya na gobyernu para ta proyekto, serbisyo, anna maski anni laman nga iyawa da nga uffun.

Egga ta 2,194 y bilang na minannigay nga tinakkilalan na BFAR nga nabillayan ta P3,000. Turi nga sumatotal, 1,181 ay maggafu ta Cagayan, 86 ta Batanes, 216 ta Isabela, anna pitu ta Quirino.

Nekagi gapa ni BFAR-2 Regional Director Angel Encarnacion nga aru paga y programa nga manguffun ta minannigay ira tapenu umaru y mala da nga ika-ikan, anna tapenu ari magimmang y allaku da ta merkado maski ta karagunan na COVID-19 pandemic.

Segun sa, y BFAR ay kanayun nga mangiyalawa ta libre nga ifun, allikaman nga meyusa ta passigay, anna technical nga uffun ta benefisyaryo ira.

Meammung paga taw yuri pagasisti na BFAR nga mangiyangay ta produktos na minnanigay ira ta merkado megafu ta uffun na Kadiwa ni Ani at Kita ta interu rehiyon. 

Negarantisa gapa ni Encarnacion ta benefisyaryo ira na BFAR, nga y ahensya da ay makkanayun nga mangiyalawa ta uffun ta aquaculture, commercial fishery, anna post-harvest. (OTB/JKC/PIA-Cagayan)