IBA, Zambales (PIA) -- Pumirma ng Memorandum of Agreement o MOA ang Zambales Police Provincial Office sa iba’t ibang stakeholder para sa implementasyon ng KASIMBAYANAN o Kapulisan, Simbahan at Pamayanan.
 
Kabilang na riyan ang National Police Commission, Army 33rd Mechanized Infantry Company, Philippine Drug Enforcement Agency, Provincial Liga ng mga Barangay, Committee on Peace and Order ng Sangguniang Panlalawigan, Provincial Faith-based Group at Philippine Information Agency.
 
Ayon kay Police Provincial Director Police Colonel Fitz Macariola, layunin ng KASIMBAYANAN na bigyang-diin ang kahalagahan ng papel ng kapulisan, simbahan, at komunidad tungo sa pagpapanatili ng kapayapaan at kaayusan sa lalawigan.
 
Sa ilalim ng MOA, ang kapulisan at simbahan ay magtutulungan sa pagpapaigting ng police-community relations sa pamamagitan ng mga pulong-pulong sa barangay, seminar at iba pang advocacy drive.
 
Magkakaroon din ng 24/7 hotline at complaint center ang bawat nasasakupang Municipal Police Station para sa epektibong pagmomonitor at pagrereport.
 
Kabilang sa magiging aktibidad ng proyekto ang pagsasagawa ng mga Squad Weekly Interactive Meeting para sa internal cleansing ng mga kapulisan na pangungunahan ng iba't-ibang faith-based group leaders. (CLJD/RGP-PIA 3)