TAGBILARAN CITY, Bohol, July 7 (PIA) -- Wala nay Presidential Communications and Operations Office (PCOO) ug ang iyang nasukip nga mga ahensya.

Kini human gireorganisa ug gihinganlan og lain ang nasampit nga buhatan ug gibalik na ngadto sa Office of the Press Secretary (OPS).

Gani, bisan ang Office of the Presidential Spokesperson, papas na usab.

Apan bisan pa, padayun pa gihapon ang paslisiya sa Administrasyon ni Presidente Ferdinand Marcos Jr., sa pag-amoma sa mga katawhang nasayud ug nalamdagan, napanalipdan ug naduso ang labing taas nga batakan sa pagpahayag sa ilang hunahuna ug pagtamud sa kagawasan sa prensa.

Polisiya pa gihapon sa Administrasyon ang  paghatag sa matuod, tumbok, gikinahanglan ug magamit nga kasayuran pinaagi sa epektibo nga paggamit sa mga himan ug kagamitan sa komunikasyon nga iyaha sa kagamhanan, saysay sa Executive Order No. 2, series of 2022.

Matud pa sa nasampit nga EO, pinaagi sa Memorandum No. 32 series of 1986, namugna ang Office of the Press Secretary nga maoy nagdumala sa kasayuran ug pagpadagan sa komunikasyon sa Buhatan sa Presidente o Office of the President (OP).

Ug pinaagi sa Executive Order No 4, series of 2010, gimugna ang PCOO ug giorganisa ang mga ahensya nga nauban niini.

Niadtong 2020, pinaagi sa Executive Order No 111, gipahibalik ang Office of the Presidential Spokesperson samtang hingpit nang gipapas ang Presidental Communications Development and Strategic Planning Office.

Kini ang nakita sa bag-ong Administrasyon nga kinahanglan hipnoon ug tipo-tipuon ang mga communications arms sa Administratsiyon alang sa mas dali ug epektibong paghan-ay sa mga polisiya nga pang publiko ngadto sa katawhan, butang nga anaa usab sa mga gahum sa Presidente.

Tungod niini, matud sa Presidente, ang PCOO kaniadto, gibungkag na og mahimo na nga Office of the Press Secretary, nga pangulohan sa Press Secretary.

Dala na usab niini, naa na sa ilawom sa OPS ang Apo Production Unit, Bureau of Broadcast services, Intercontinental Broadcasting Corporation, National Printing Office, News and Information Bureau ug ang Peoples Television Network Inc.

Ang Radio TV Malacanang, direkta nga nga ubos sa Office of the President (OP) samtang ang Philippine Information Agency, ubos na sa direktang superbisyon sa OP.  (RAHC/PIA7 Bohol)