Tiniyak ng Department of Human Settlements and Urban Development (DHSUD) na nakahanda silang magbigay ng kaukulang tulong sa mga naapektuhan sa pagtama ng magnitude 7 earthquake saNorthwestern Luzon nitong Hulyo 27, 2022.
Sa Laging Handa Public Briefing ngayong araw (August 1, 2022), sinabi ni DHSUD ASec. for Support System Avelino Tolentino na naka-monitor ang kanilang mga tao sa mga naapektuhan sa pagyanig.
Aniya, direktang nakikipag-ugnayan ang binuo nilang Local Shelter Cluster Teams sa mga pamahalaang lokal upang makumpirma at malaman ang tunay na kalagayan ng mga naapektuhan ng lindol.
"Ang utos po ng aming bagong kalihim ay maghanap po ng mga resources na puwede po nating gamitin na nandito sa aming kagawaran upang mas mapabilis 'yung aming responde rito," saad ni Tolentino.
Sinabi ng opisyal plano nilang i-realign ang bahagi ng pondo ng mga ito upang magamit sa disaster program. Tinitingnan din aniya nila ang posibilidad na pagpapatupad ng Rental Subsidy para sa mga displaced families.
Plano rin nila na bisitahin ang mga naapektuhang lugar kung maayos na ang sitwasyon.
Inihayag naman ni Tolentino na tatalakayin pa ng mga kinauukulan ang pagpapatupad ng Emergency Shelter Assistance Program.
"Meron din ho kasing Emergency Housing Assistance Program ang aming National Housing Authority (NHA). There are still funds available dun po sa aming budget at 'yun po ang titignan namin kung papaano po natin ire-release," ani opisyal.
Binanggit ni Tolentino na ang mga biktima ng bagyo noong nakaraang taon, nakapagbigay ang NHA ng P5,000 financial assistance para sa bawat pamilya at hanggang P30,000 housing assistance depende sa sira ng istruktura.
Una nang nagsagawa ang DHSUD-CAR ng ocular inspection sa Abra upang makita ang emergency shelter needs na naapektuhan sa malakas na pagyanig.
Maigting na nakikipag-ugnayan ang DHSUD sa mga partner agencies nito at sa lokal a pamahalaan upang mapabilis ang pagbibigay ng shelter assistance sa mga apektadong pamilya. (DEG-PIA CAR)
