"Two years na pong na-hamper 'yung pag-aaral at learning ng ating mga estudyante. Our goal is hindi na po natin ide-delay ang opening of classes para makapag-aral na po 'yung hindi nakapag-aral ng dalawang taon pero in consideration of their health and safety, we will explore 'yung other modes such as modular or kung puwede pong distance learning through internet, gagawin po natin," pahayag ni Poa.
Una nang nagtungo sa Abra sina DepEd Undersecretary for Field Operations Revsee Escobedo at Assistant Secretary Francis Cesar Bringas kasama ang iba pang kawani ng DepEd Central Office upang magsagawa ng assessment sa epekto ng lindol sa mga paaralan doon. Tiningnan din nila ang kalagayan ng mga mag-aaral at mga guro sa lalawigan.
Sa isinagawang exit conference nitong Miyerkules, kabilang sa mga napagkasunduan ang pakikipag-ugnayan ng DepEd sa Department of Public Works and Highways upang matalakay ang mga sirang idinulot ng pagyanig sa mga school buildings, ang paggamit ng school operational budget para sa mga agarang pangangailangan, at ang patuloy na pagbibigay ng psychological first aid sa mga guro, school personnel at learners. (JDP/DEG-PIA CAR)
