TAGBILARAN CITY, Bohol, August 12 (PIA) -- Gikumpirmar sa Philippine Postal Office (PHLPost) nga usa  ka scam ang usa  ka quiz game, nga nikatap karon sa social media.  

Sa post sa ahensya sa ilang official page, gipasidan-an niini ang publiko ug miingon nga wala sila manghatag og pinansyal nga tabang o bisan unsang may kalabutan nga programa sa pagkakaron. 

Dugang pa sa ahensya, mahimong magbaton og akses ang mga scammer sa mga personal nga impormasyon nga pangayuon sa website sa higayon nga i-click ang link. 

Pahinumdom pa sa PHLPost, dili gayud buhaton sa ilang ahensya ang motawag, mag-text o mag-email, ug mangayo og personal nga impormasyon o mag-request og bayad o magpa-click og bisan unsang email link, aron maka-claim og bisan unsang package. 

Nipagawas og public announcement ang PHLPost human sa nanggawas nga link nga gipang-share karon sa social media, diin kinahanglan lamang motubag og upat ka pangutana, ug adunay kahigayonan nga makadaog og P7,000 nga ayuda ug ma-claim lamang kini kun ma-share ang link sa ubang tawo. (ECB/PIA7 Bohol)