LUNGSOD NG CALAPAN, Oriental Mindoro (PIA) – Pormal ng binuksan sa unang linggo ng Setyembre sa Naujan Town Plaza ang ‘Agro-Trade Fair 2022, Progresibong Naujan, Now Na!’ na pinangunahan ni Mayor Henry Joel Teves kasabay ng pagdiriwang ng kapistahan ng Patron San Nicolas de Tolentino.

Tampok sa naturang aktibidad na pinangasiwaan ni Municipal Agriculturist, Raquelita Umali ng Municipal Agriculture’s Office ang mga nagga-gandahang booth na puno ng palamuti at makikita sa loob nito ang iba’t-ibang produkto na dinesenyuhan ng bawat barangay na pinamumunuan ng mga punong barangay kasama ang sangguniang barangay.

Ang mga produkto na makikita sa booth ay mga prutas, gulay, mga inuming itinitimpla at marami pang iba.

Sinabi ng punong bayan sa kanyang mensahe, “Handa akong tumulong para sa ikauunlad ng bawat barangay. Kailangan maipakilala at maibenta ang mga produkto na gawa ng ating mga kababayan sa labas ng Naujan at maipagmalaki na ito ay gawa ng isang Naujeño.”