ILOILO CITY (PIA) - - Nagpain ang Department of Budget and Management (DBM) sang masobra sa P23 bilyones sa idalum sang ginaproponer nga 2023 national budget agud mapaayo ang nagkalain-lain nga health care facilities kag serbisyo sa bilog nga pungsod.
Ining importante nga kantidad sang badyet agud suportahan ang Health Facilities Enhancement Program (HFEP) ang may kaangtanan sa pangako sang administrasyon ni Presidente Ferdinand R. Marcos, Jr. nga maghatag sang kalidad kag masarangan nga health care para sa tanan nga mga Filipino.
Tinutuyo man sang programa nga pagadal-on ang husto nga health care sa mga rehiyon kag rural areas.
Pagagamiton ang P23 bilyones sa pagbakal sang mga gamit medikal subong man sa konstrukyon, rehabilitasyon kag pagpaayo sang nagkalain-lain nga pasilidad para sa ikaayong lawas sa bilog nga pungsod, kasubong sang mga barangay health station (P2 ka bilyon), mga rural health unit (P5.6 ka bilyon), mga polyclinic (P80 ka milyon), mga lokal nga panguluhan, (P2.7 ka bilyon), mga DOH hospital (11.2 ka bilyon) kag iban pa nga pasilidad sa ikaayong lawas (P1.3 ka bilyon).
Ginpahayag ni Budget Secretary Amenah F. Pangandaman nga ang pondo para sa 2023 HFEP ang nakasentro sa ginkilala nga "gaps" sandig sa updated Philippine Health Facility Development Plan for 2022 tubtub 2040 nga nagasuporta sa implementasyon sang Universal Health Care Act.
“Kinahanglan naton nga mangin preparado sa anuman nga waay ginapaabot nga sitwasyon kag emerhensiya sa ikaayong lawas. Ginpakita sang pandemya sa COVID-19 ang kakinahanglanon para sa mabaskog nga health care system gani ang health care magapadayon nga prayoridad sa badyet,” gindugang ni Pangandaman.
Sa kabilugan, ang sektor sa ikaayong lawas magabaton sang daku nga budget allocation nga P296 bilyon sa idalum sang 2023 National Expenditure Program (NEP).
Magluwas sa pagpaayo sang pasilidad sa ikaayong lawas kag serbisyo ang administrasyon ni Pangulong Marcos magapain man sang pondo para sa mabaskog pa nga health care system sang pungsod pinaagi sa paghatag suporta sa healthcare workforce, research and development, kag mapat-ud ang masarangan kag inclusive healthcare. (JBG/DBM/laf/PIA6-Iloilo)
