NAVAL, Biliran (PIA) -- Gidesisyonan sa local nga pangagamhanan sa lungsod sa Naval ang pagsera sa pipila ka mga kalsada o kalye sa Naval diin ipahigayon ang Tsinelas party.
Isip suporta sa tinuig nga kalihokan sa pista, gitugotan sa Sangguniang Bayan sa Naval pagka Septeyembre 19, ang Resolution No. 49 Series of 2022, nga temporaryong magsera sa Garcia, Redaza, Burgos, Castin, Icain, Sabenorio, ug P. Inocentes Streets gikan sa alas 4 ang takna sa hapon sa Oktobre 1 kutob sa alas 5 sa buntag sa Oktobre 2, aron paghatag ug lugar sa Tsinelas Party.
Ang Tsinelas Party tinuig na nga kalihokan sa pista sa Naval diin sa sinugdan gihatag kini nga kahigayon alang sa tanan Navaleño gikan sa tanang estado sa kinabuhi nga makapahalibway ug makasaulog sa pista nga gihalad sa patronang ang Birhen del Rosario.
Wala niini kinahanglana ang mga garboso nga biste o senina ug wala usab kinahanglana nga makasapatos sa pagtambong aron dili mauwaw ang mga gustong motambong ug maglipay nga walay ikapalit ug mga bag-o o maanindot nga mga pangporma.
Sa pipila na ka mga tuig, nailhan ang Tsinelas Party nga dakong kalihokan sa kapistahan sa lungsod sa Naval diin kini gidugok na usab sa daghang mga bisita gikan sa nagkalain-laing mga dapit lakip na sa mga langyaw nga mga bisita.
Gipahigayon ang religious fiesta sa Naval matag unang adlawng Sabado sa buwan sa Oktobre diin kini nahulog sa Oktobre 1 karon nga tuig. (MMP/MLT/PIA8 Biliran)
