TAGBILARAN CITY, Bohol, Sept. 28 (PIA) -- Nipasidaan ang Land Transportation Franchising and Regulatory Board (LTFRB) sa mga dili mosunod nga pampublikong sakyanan sa limitasyong gitakda alang sa mga magtindog nga pasahero.

Matud pa sa LTFRB, dakpon nila ang public utility vehicles (PUVs) nga molapas sa limitasyon ug pahamtangan og P5,000 multa.

Sa usa  ka pahayag, miingon si LTFRB board member Mercy Jane Paras-Leynes nga gitakda ang maximum nga gidaghanon sa mga magtindog nga pasahero sa matag PUV.

“Kapag nahuli po sila na lumabag, sumobra doon sa number of maximum passengers o kaya hindi nag-observe ng public health protocols, maari po na magkaroon sila ng multa na P5,000 para sa violation of their franchise terms,” matud pa ni Leynes.

Base sa Memorandum Circular No. 2022-070, ang public utility bus (PUBs) ug modern public utility jeepney (MPUJs) Class 2 tugotang adunay mga nakatindog nga pasahero ubos sa mga mosunod nga kondisyon:

1. Alang sa Low Entry/Low Floor PUBs, maximum nga 15 nga nakatindog nga pasahero lang ang gitugotan, nga may dili moubos sa usa  ka tawo ang gilay-on;
2. Alang sa mga Coach-type nga PUB, maximum nga 10 nakatindog nga pasahero lang ang gitugotan nga may dili moubos sa usa  ka tawo ang gilay-on ug;
3. Alang sa MPUJs-Class 2, maximum nga 5 nakatindog nga pasahero lamang ang gitugotan, nga may dili moubos sa usa  ka tawo ang gilay-on.

Si Leynes nagkanayon nga mahimo pa gihapong mabag-o sa LTFRB kining mga lakang depende sa pag-uswag sa sitwasyon sa COVID-19 sa nasod. (ECB/PIA7 Bohol)