SAN JOSE, Antique (PIA) – Gintun-an kang mga magagmay nga negosyo ukon micro, small and medium enterprises (MSMEs) ridya ang visual merchandising ukon ang insakto nga pagplastar kang produkto kag serbisyo sa tindahan ukon exhibit para makaganyak kang duro nga manugbakal.
Dya nga aktibidad ang ginpangunahan kang Department of Trade and Industry (DTI) Antique Provincial Office para tudluan ang mga negosyante kang insakto nga pag-organisa kang mga produkto sa anda mga tindahan ukon exhibit.
Ginpahayag ni DTI Antique OIC provincial director Engr. Lynna Joy Cardinal nga ang visual merchandising kinahanglan tugruan importansya bangod dya nagapangagda kang atensyon halin sa mga kustomer.
Dugang na pa, nagakaigo nga liwaton ang nagriligad nga mga training kag seminar agod mahanas ang kinaaram kang mga negosyante.
Nagserbe bilang resource person sa aktibidad sangka design specialist kag trade fair curator nga si Ares Belcarse nga nagtugro kang mga estratehiya sa visual merchandising.

Suno kay Belcarse, dapat manami kang organisado ang pagplastar kang mga produkto para dasig madiparahan kang mga manugbakal ilabi ron sa tunga kang kompetisyon sa merkado.

Dugang na pa, dapat magtinguha ang mga negosyante nga makilal-an kag madumduman ang anda “brand” kay dya nagabulig pataas kang benta.
Gani ginhingyo ni Belcarse ang mga negosyante nga nagabaligya sa pareho online kag pisikal nga pwesto nga sarahun lang ang pagkakilal-an ukon “brand”.
Suno kay Francia Tongol kang Francia Handicrafts Manufacturing, nagtugro ang dyang hirikuton kang mga pamaagi para mapasanyog ang display kang ana ubra nga mga sapatos sa ana tindahan kag nanari-sari nga mga trade fair kag exhibit.
Ang virtual merchandising isara ka istratehiya nga ginagamit para mapasanyog ang “brand” kang mga negosyo, makaganyak kang mga manugbakal kag mapataas ang kita. (AAL/BPS/PIA Antique)