LUNGSOD NG CALAPAN, Oriental Mindoro (PIA) – Bilang pagpapatuloy ng pagdiriwang ng Consumers Welfare Month ngayong buwan ng Oktubre na may temang; Sustainable Consumerism in the Digital Age, ginawaran ng Department of Trade and Industry Oriental Mindoro (DTI-OrMin) ang nasa 50 establisyimento sa buong lalawigan ng Bagwis Seal of Excellence dahil sa ipinamalas na galing sa pag ne-negosyo na isinagawa kamakailan sa lungsod na ito.
Ginanap ang nasabing aktibidad kasabay ng ‘2022 DTI Bagwis Awards and Forum on services and Repair Enterprises’ na pinagunahan ni DTI Provincial Director Arnel Hutalla na dinaluhan din ni City Mayor Marilou Flores-Morillo upang ipagkaloob ang nasabing parangal.
Ang Bagwis Seal of Excellence ay iginagawad sa mga establisyemento na nagpasa ng aplikasyon, at sumailalim sa mabusising pagsusuri ng DTI na naayon sa DTI Department Administration Order No. 17-08 Series of 2017 na nakasaad sa Implementing Guidelines on the Grant of Bagwis Awards to Business Establishments that Uphold Consumer Rights and Interest, and Practice Business Ethics.
