Dagdag na paliwanag ni Habana na ang surfing competition ay naglalayon na maisama ang sports na ito sa mga tourist attraction sa lalawigan ng Palawan at mahikayat pa ang mga Palaweño surfers na lalo pang pag-igihin ang kanilang abilidad upang magkaroon ang mga ito oportunidad na sumabak sa mga national at international competition.
Ani Habana, para sa development ng turismo sa Palawan, ang surfing ang isa sa magiging atraksiyon dito. Nandiyan na aniya ang Puerto Princesa Underground River, ang nagagadahang mga isla ng Coron at El Nido at magiging karagdagang atraksiyon aniya itong surfing.
Marami na rin aniyang mga tourist town ang naging maunlad dahil sa surfing tulad ng Siargao, Baler at La Union.
Mayroon namang apat na kategorya ang Paragua San Vic Surfing Competition kung saan ang mga magwawagi ay pagkakalooban ng sumusunod na premyo base sa kategoryang lalahukan: Men's Shortboard Open- P50,000.00; Men's Longboard Open- P40,000.00; Women's Longboard Open- P25,000.00; Junior's Longboard Open- P20,000.00.
Ang lahat din ng magwawaging partisipante ay makakatanggap ng round trip ticket mula Maynila patungong San Vicente sa pamamagitan ng Sunlight Air at gift certificate mula sa Hotel Elizabeth.
Ang Paragua Coastown ng MegaWorld Corporation ang major sponsor ng nasabing competition.
Siniguro naman ng LGU San Vicente na handa ang kanilang munisipyo sa posibleng pagdagsa ng mga turista sa lugar maging ang health protocol na dapat sundin, ayon kay San Vicente Tourism Officer Lucy Panagsagan sa isinagawang press conference.
Maliban dito, bahagi rin ng aktibidad ang idinaos na surfing competition ngayong buwan ng Nobyembre sa Nagtabon Beach sa Puerto Princesa City at ang surfing competition sa Disyembre na gaganapin naman sa Duli Beach sa El Nido, Palawan.
Sa mga nais lumahok at sa iba pang detalye ng kompetisyon, maaaring bisitahin ang kanilang facebook page na: https://www.facebook.com/sanvicsurf. (OCJ/PIA-MIMAROPA, Palawan)
