TAGBILARAN CITY, Bohol, Nov. 8 (PIA) -- Gikan sa text messages nga nagpahibalo nga nidaog sa usa  ka raffle hangtod sa  pagtanyag og trabaho nga may dakung sweldo, ni level up na usab ang mga scammer aron makapangilad.

Karon, link sa Tiktok video nga adunay caption nga, “Kung ikaw ba ang nasa video?" ang nikatap karon.

Matud pa sa tigpamaba sa Philippine National Police (PNP) nga si PCol. Jean Fajardo, ayaw sulayi og click ang  mga nahisgotang link gikan sa mga dili kailang nagpadala o sender tungod kay usa  kini ka scam .

Pasidaan pa sa PNP nga ma-hack ang social media account hangtod sa magamit kini sa pangpangayo og salapi sa mga kaila sa mabiktima niining bag-ong scam.

Matud pa nga daku usab ang kakuyaw nga maablihan niini bisan ang mga Gcash account sa mabiktima.

Sa pagkakaron, gi-imbestigahan na sa PNP-Anti Cybercrime Group (PNP-ACG) ang maong Tiktok link.

Tungod sa padayon nga pagpang-biktima sa mga scammer sa social media, gipalapdan na usab sa PNP ang ilang cyber patrolling.

Base sa talaan sa PNP-ACG nakatala na  sila og 118 ka reklamo sa scam sa social media sulod lamang sa 3 ka buwan.

Kun mabiktima niining bag-ong scam, isumbong dayon sa Facebook account o website sa PNP-ACG o sa pinakaduol nga buhatan sa kapolisan. (ECB/PIA7 Bohol)