NABUNTURAN, Davao de Oro, November 2 (PIA) - - Giila ni  Presidente Ferdinand R. Marcos ang panginahanglanon sa public-private partnership-style system aron matabangan ang paglambo sa mga start-up ug micro, small, and medium enterprises (MSMEs).

Gisugyot kini sa Presidente atol sa usa ka situation briefing sa Department of Trade and Industry sa Western Visayas regional office isip sideline sa iyang biyahe alang sa Masskara Festival sa Bacolod City.

Uban sa daghang mga proyekto sa Department of Trade and Industry (DTI) nga nagasuporta sa mga start-up nga negosyo ug MSMEs, miingon si Presidente Marcos nga ang ahensya kinahanglang maghimo ug sistema nga mokonek kanila sa mga pribadong financier ug investors aron matabangan sila sa pagpadayon ug pagpalambo sa ilang negosyo.

“We should be ready to bring our support one step further. There should be a support system to assist start-ups and our MSMEs by opening doors to new connections, get them to the digital world to help them connect with private companies for support,” matud sa Presidente.

Kinahanglang padak-on sa DTI ang mga paningkamot sa pagpaila sa mga bag-ong negosyo ngadto sa publiko aron ang mga interesado nga moapil o mosuporta sa negosyo makahimo niini, matud ni Marcos.

“Make people aware of these businesses kasi madaming magaganda so that we can find people to partner with them,” ingon niya.

Sa iyang inaugural State of the Nation Address (SONA), gisubli ni Marcos ang “commitment to work hand-in-hand with all stakeholders to make certain that MSMEs are protected and provided with ample opportunities.”(PND/Jerson Delgado)