PUERTO PRINCESA, Palawan, (PIA) -- Nagsagawa ng isang Press Conference ang Information, Education and Communication Committee ng Provincial Inter-Agency Council Against Trafficking-Violation Against Women and Children-Anti Child Pornography (PIACAT-VAWC-ACP) noong Nobyembre 24 sa VJR Hall, Capitol Building, Puerto Princesa City.
Ito ay bilang pagsisimula ng mga aktibidad ng konseho sa pag-obserba ng 18 araw na kampaniya para matigil na ang mga karahasan laban sa mga kababaihan na nakasaad sa Proclamation 1172 na inilabas noong taong 2006.
Kabilang sa mga naging speaker ay si Lt. Gretch Mary B. Acuario, Legal Officer ng Philippine Coast Guard District Palawan na tinalakay ang tungkol sa Republic Act 9262 o ang Anti-Violence Against Women and their Children Act of 2004. Aniya, apat na karahasan ang sakop ng batas partikular na ang Physical Violence, Sexual Violence, at Psychological Violence.
Tumutok naman si Milma Sangkula, Program Officer IV ng Peace and Order Program ng Pamahalaang Panlalawigan ng Palawan sa mga programa ng Lokal na Pamahalaan hinggil sa Human Trafficking sa lalawigan kung saan kaniyang iniulat na marami na silang nasagip na mga kababaihan na dadalhin sana sa bansang Malaysia. Magkagayunman, bumaba aniya ang kaso ng human trafficking sa Palawan ngayon pero sa kanilang pagmamatyag ay muli na naman aniyang nagbabantang bumalik sa gawain ang mga masasamang loob. Kinumpirma niya rin na hindi na lang ginagawang daanan ang Southern Palawan bagkus ay mayroon na ring mga taga-lalawigan ang mga nabibiktima.
Sinabi naman ni Bantay Palawan Task Force Program Manager PNP General Reynaldo Jagmis (RET) na ang modus operandi ng mga human trafficker ay mag-aalok kunwari ng magandang trabaho subalit sa huli ay mauuwi ito sa prostitusyon kaya dapat aniyang malaman ng mga posibleng biktima ang ganitong mga modus operandi ng mga sindikato para hindi mabiktima.
Kinumpirma naman ni Lucita F. Padul, Social Welfare Officer IV, Chief, Operations and Program Division ng Provincial Social Welfare and Development Office (PSWDO) na nagbibigay sila sa mga biktima ng psychosocial services, livelihood assistance, counselling at referral. Ang 18-day campaign to End Violence Against Women ay magsisimula sa November 25 hanggang December 12 na may temang 'United for a VAW-FREE Philippines'. (MCE/PIA MIMAROPA)
Larawan sa taas: (Mula sa kaliwa) Sina Lt. Gretch Mary B. Acuario, legal officer ng Philippine Coast Guard District Palawan, Milma Sangkula, Program Officer IV ng Peace and Order Program ng Pamahalaang Panlalawigan ng Palawan, Bantay Palawan Task Force Program Manager PNP General Reynaldo Jagmis (RET) at Lucita F. Padul, Social Welfare Officer IV, Chief, Operations and Program Division ng Provincial Social Welfare and Development Office (PSWDO) sa Press Conference ng Information, Education and Communication Committee ng ng Provincial Inter-Agency Council Against Trafficking (PIACAT) sa VJR Hall, Capitol Building, Puerto Princesa City noong November 24,2022. (Larawan mula sa PIO Palawan)