Sa ana mensahe, ginpasalamatan ni Gobernador Rhodora Cadiao ang mga BHW kag BNS sa anda kontribusyon sa pagpatuman kang mga programa kag serbisyo sa ikaayong lawas, ilabi ron sa tunga kang COVID-19, dengue outbreak, kag bagyong “Paeng.”

Dugang pa kang gobernadora, ana gid nasaksihan ang pagpanikasog sa ubra kang mga community health workers gani, ang pagsiguro kang gobyerno probinsyal nga sanda makabaton kang mas bahol nga insentibo kag may proteksyon batok sa indi insakto nga pag-buol kang anda trabaho.

Siya nagahandom man nga padayunon kang masunod nga mga opisyales kang probinsya ang mga serbisyo nga nagakaangay para sa mga BHW kag BNS.

Indi magnubo sa 1,707 ka mga BHW kag BNS ang nagtambong sa ginhiwat nga “summit” kung sa diin sanda nakabaton kang insentibo, t-shirt, payong, kag pagkaon.

Bug-os ang pagpasalamat ni Alita Panganiban, 33 ka tuig ron nga naga-serbe bilang Barangay Health Worker (BHW) sa Brgy. Lindero, banwa kang Libertad, sa mga pamaskwa nga gintugro kang gobyerno probinsyal nga ana gamiton sa pagpakay-ad kang ana balay kag para man sa pagselebrar kang Paskwa.

Nag-tambong man sa aktibidad ang bise-gobernador kag SP Presiding Officer Edgar Denosta kag pira ka mga SP members.