VALENCIA CITY (PIA)—Gikumpirma sa Civil Service Commission Regional Office 10 nga andam na ang Valencia City nga mag-host sa Civil Service Examinations nga ipahigayon karong umaabot Marso 26, 2023.

Personal nga gibisita ni CSC Regional Director Grace Belgado-Saqueton si Valencia City Mayor Azucena P. Huervas kauban si CSC Provincial Director Lourdes Pelaez ug CSC Chief Human Resource Specialist Eden Banaag aron hisgutan ug kumpirmahon ang kaandam sa syudad isip exam host.

Kapin sa 3,000 ka mga examinees ang gipaabot nga mokuha sa mga pasulit gikan sa nagkalain-laing lugar sa Bukidnon ug kasikbit nga mga siyudad ug probinsiya, nga siguradong makadugang sa ekonomikanhong kalihokan sa syudad sa Valencia.

Kini subay usab sa panglantaw sa Mayor nga himo-ong madanihon nga venue ang syudad alang sa mga meeting, incentive, conference, ug uban pang mga kalihukan.

Dako ang kalipay ni Emerlita Gempisao, taga Malaybalay City, tungod kay duol nalang matud pa ang iyang biyahe-on atol sa naka-schedule nga ‘career service exam’ sa CSC karong umaabot March 2023.

"Maayo kaayo kini nga balita kay kami nga taga Malaybalay dili na mahago ug biyahe padulong sa Cagayan de Oro sa pag-take sa exam sa CSC. Hinaut unta nga padayonon na ni nga ang Valencia mo-host sa exam sa civil service,” miingon siya. (BGE/PIA 10-Bukidnon)