LUNGSOD NG LUCENA, Quezon- Idinaos noong Enero 16 sa Quezon Convention Center sa lungsod na ito ng Quezon Provincial Police Office (QPPO) ang Simultaneous Mass Oath-Taking, Donning, and Pinning of Ranks ng mahigit 470 kapulisan sa lalawigan matapos mai-angat ang kanilang ranggo dahil sa kanilang ipinakitang husay at galing bilang mga alagad ng batas.
Pinaalalahanan ni PCol. Ledon D. Monte, Provincial Director ng Quezon PPO, ang mga promoted na pulis na may kaakibat na malaking responsibilidad ang pagtaas ng kanilang mga posisyon kung kaya’t inaasahan na patuloy nilang pagbubutihan ang mandatong iniatang sa kanila ng batas.
Siniguro rin ni PCol. Monte na mas gaganahan at magiging inspirado sa pagtatrabaho ang kapulisan lalo na’t ngayo’y marami sa kanila ang na-promote.
“Tuloy-tuloy ang operasyon ng Quezon PNP” upang labanan ang iligal na droga sa ating lalawigan, gayundin ang pakikipagtulungan natin sa Land Transportation Office (LTO) at Pamahalaang Panlalawigan ng Quezon tumaaas sa hangaring unti-unting bumaba ang bilang ng vehicular accident sa ating probinsya,” sabi pa ni Monte
Dumalo din sa okasyon si Gov. Helen Tan kung saan inihayag niya na gusto niyang makita ang lahat ng performance report ng bawa’t municipal police officers sa lalawigan upang malaman anong best practices ang maaaring gayahin at ipatupad sa ibang municipal police station.
“Mahalagang component ng kaunlaran ay ang peace and order situation sa isang bayan upang maging payapa ang paninirahan sa bawa’t lugar sa lalawigan,“ sabi pa ni Tan
Matatandaang nagkaroon ng kauna-unahang Quezon Road Safety Summit 2022 sa lalawigan na pinangunahan ni Quezon Governor Helen Tan kasama ang Quezon PPO, bilang tugon sa hangaring mabawasan at maiwasan ang aksidente sa kalsada, at kung magkaroon man, palaging mayroong handang rumesponde anumang oras. (RMO-PIA Quezon)