CEBU CITY, Cebu, Jan. 19 (PIA) -- Malipayon nga gipaambit sa mga nag-unang law enforcement agencies, Philippine Drug Enforcement Agency 7 (PDEA-7) ug Police Regional Office 7 (PRO-7) ang mga positibong kalambuan nga napupo sa gobyerno sa nagpadayun nga gubat niini batok ilegal nga drugas.
Ang PDEA-7 ug PRO-7 mipadayag nga angay nang makonsiderar nga malampuson ang kampanya batok ilegal nga drugas sa Central Visayas sa milabay nga mga katuigan kini mahitungod sa subsub ug walay hunong nga mga pagpaningkamot, pinaagi sa gipatuman niini nga mga nagkalain-laing estratehiya nga nahimung epektibo sa pagbuntog sa dugay nang problema sa komunidad.
"We are very happy because for the year 2022 daghan pud tang mga na clear na mga barangays under the barangay drug clearing program," sigon in PDEA-7 Information Officer III Leia Alcantara atol sa gipahigayon nga Kapihan sa PIA niadtong Enero 18 nga gipasiugda sa Philippine Information Agency Region 7.
Matod usab sa PDEA-7, nga usa sa dakong basehan sa kalampusan sa ilang anti-illegal drug campaign mao ang pagus-us sa drug affectation rate sa rehiyon nga anaa na lamang sa 48% nga mikunhod gikan sa 97% sukad nga gipatuman ang barangay drug clearing program.
Sa paghuman sa tuig 2022, adunay nay 1,444 gikan sa kinatibuk-ang 3,003 ka mga barangay sa Central Visayas ang gideklarar na isip drug-cleared barangays samtang anaa na usab sa 116 ka mga barangay ang giila na isip drug-free barangays.
Nag-una niini ang Bohol nga adunay 610 drug-cleared barangays", gisundan sa Cebu nga anaay 123 drug-cleared barangays, 35 sa Negros Oriental. 8 sa Mandaue City, 2 sa Cebu City, ug 2 usab sa Lapu-lapu City.
Gawas niini, anaa na usab 6 ka mga local government units sa Central Visayas ang nahimu nang drug-cleared municipalities kini mao ang: lungsod sa Enrique Villanueva sa probinsya sa Siquijor, ug mga lungsod sa Poro, Pilar, San Francisco, Madridejos, ug Santander sa probinsya sa Cebu.
Ang PRO-7 sa ilang bahin, nipamatuod usab sa kalampusan sa kampanaya batok ilegal nga drugas kini giingon nga tungod sa daghang operasyon kung diin anaa sa 6,260 anti-illegal operations ang gipatuman sa kapulisan sa tuig 2022 nga miresulta sa pagkarekober sa ilegal nga drugas nga ang kinatibuk-ang kantidad anaa sa P1,331,353,282 ug pagdakop sa 8,106 ka mga illegal drug personalities sa susamang tuig.
Kabahin niini. gitumbok usab sa kapulisan sa Central Visayas nga ang maong kalampusan dili mahitabo kung wala ang partisipasyon ug suporta nga gitanyag sa komunidad ngadto kanila.
"We cannot defeat illegal drugs without the help of our community (Dili nato mapildi ang illegal nga drugas kung walay tabang sa atong komunidad)," si PRO-7 Spokesperson PLtCol. Gerard Ace Pelare miingon atol sa nahisgotang forum.
"We need to have the community on our side by doing our job well and telling them that the fight or the problem against illegal drugs is everyone's concern (Kinahanglan nga anaa sa atong kiliran ang komunidad pinaagi sa pagbuhat sa atong trabaho og pagsulti kanila nga ang pakigbatok o ang problema batok sa ilegal nga drugas kay problema sa tanan)," dugang sa tigpamaba sa PRO-7. (RGC/PIA7 Cebu).
