KALIBO, Aklan (PIA) -- Nangin matawhay ro selebrasyon it Sto. Nino Ati-Atihan Festival 2023 sa banwa it Kalibo, suno sa Aklan Police Provincial Office (APPO).

Ginhambae ni Police Colonel Crisaleo Tolentino, Provincial Director it APPO, nga uwa it may natabo nga mayor nga krimen sa kabilugan it selebrasyon it kapyestahan ni Sto. Niño.

Mga minor nga mga insidente eamang ro natabo suno kana, kaparehos it mga simpleng inaway nga eagi man nga naayos it mga nagrespondeng pulis ag mga naduea nga inunga nga nakita man eagi ag dayon nga naikabalik sa andang mga ginikanan.

Ro Task Group nagtao it maid-id ag maeawakan nga operasyon ag strikto nga pagbantay sa mga entrance ag exit it festival zone areas ag nag-establisar man it mga checkpoint ag chokepoint.

Ana man nga ginrekognisar ag gindayaw ro publiko sa gintao nga suporta ag kooperasyon ku kapyestahan nga nagresulta raya sa matawhay ag maayos nga selebrasyon.

Dugang pa, ginpasayud ni Tolentino nga pagataw-an it pagkilaea sa separar nga okasyon ro mga pulis nga nagtao it tumaeagsahon nga panerbisyo sa anda nga lugar it assignment ku Kalibo Ati-atihan Festival 2023.

Ku Lunes, Enero 16, nagbalik eon ro iba nga mga na-augment nga mga pulis sa andang orihinal nga istasyon; ro iba mat-a hay nagdiretso sa Iloilo para mag-augment man para sa Dinagyang Festival 2023. (AAL/SQP/PIA Aklan)