DAVAO CITY (PIA) – Isa-ulog ang ika-10 nga anibersaryo sa Kasambahay Day karong umalabot nga Pebrero 26, 2023 nga ipahigayon sa SM City Davao.
Pangunahan sa Department of Labor and Employment (DOLE) XI ang maong kasa-ulogan uban sa tema “Kasambahay sa Makabagong Panahon, Kaagapay at Katuwang Natin sa Pagbangon.”
Matud pa sa Focal Person sa DOLE XI, Eduardo Monreal, isip usa ka bahin sa pagtukod sa nasud ug sa pagtubo sa nasudnong ekonomiya, ang sosyal nga kaayuhan ug proteksyon sa mga domestic worker gimandu ubos sa RA No. 10361.
Sa Davao Region gimugna ang TASK Kasambahay XI nga gilangkuban sa Department of Labor and Employment XI (DOLE), Technical Education Skills Development Authority XI (TESDA), Department of Social Welfare and Development XI (DSWD), Department of the Interior and Local Government XI (DILG), Department of Education XI (DepEd), Home Development Mutual Fund XI (HDMF), Regional Tripartite Wages and Productivity Board XI (RTWPB), Philippine Health Insurance Corporation XI (PHIC), Social Security System Davao Region (SSS), Philippine Information Agency XI (PIA), San Pedro College (SPC), Liga Ng Barangay – Davao City, ug ang Local na kagamhanan sa syudad sa Davao. Kini aron magtambayayong nga ipatuman ang mga benepisyo sa mga domestic worker.
Sa umalabot nga Pebrero 26 niining tuiga gi-awhag ang aduna’y mga kasambahay na mo-adto sa SM City aron mo-atindar sa maong selebrasyon. Aduna usab ipahigayon nga nagkadaiyang serbisyo gikan sa nagkadaiyang buhatan sama sa TESDA nga maghatag og mga libre nga training, DepEd, ug uban pa nga mga serbisyo. (PIA/ETIsidro)
