SAN JOSE, Occidental Mindoro (PIA) -- Pinagkalooban kamakailan ng Department of Trade and Industry (DTI) ng mga kagamitan para sa pagproseso ng cacao ang Laudland Cacao Farmers Association (LCFA) ng bayan ng Sablayan, sa ilalim ng programang Shared Service Facility (SSF).
Ang Shared Service Facility ay flagship program ng DTI na tumutulong sa mga Micro, Small and Medium Enterprises (MSMEs) na mapaunlad ang kasanayan sa produksyon at kahusayan sa napiling negosyo sa pamamagitan ng makabagong teknolohiya. Iginagawad ang programa sa mga MSMEs na may lehitimo at tumatakbong negosyo.
Sinabi ni Nornita Guerrero, OIC Provincial Director ng DTI OccMdo, na nagsimulang umalalay ang DTI sa mga nagtatanim ng cacao sa Sablayan, tatlong taon na ang nakalipas. Natigil lamang ito dahil sa pagtama ng Bagyong Ursula na nag-iwan ng pinsala sa nabanggit na bayan.
Ayon pa kay Guerrero, sa kasalukuyan ay nagsisimula nang muling bumangon ang mga magtatanim ng cacao sa pangunguna ng LCFA. At aniya, nakahanda ring muli ang DTI na magbigay ng tulong sa samahan, lalo na’t pumasa ang LCFA sa assessment ng Kagawaran.
Kabilang sa ipinagkaloob ng DTI, sa ilalim ng SSF, ay mga kagamitan sa pag-proseso ng cacao na nagkakahalaga ng P2.673 milyon. Saad pa ng tagapamahala ng DTI OccMDo, sumasailalim din ngayon ang mga kasapi ng LCFA sa pagsasanay upang makabuo ng manual of operation, na magsisilbing gabay ng samahan sa kanilang operasyon. Susunod aniya dito ang iba pang mga training na magtataas naman sa kasanayan o skills para sa paggawa gayundin sa kalidad ng kanilang produkto.
