DAVAO CITY (PIA) – Gilauman nga anaa sobra usa ka libo ang motambung, sa unang higayon, sa ipahigayon nga National Peace Convention karong Enero 25, 2023 sa Philippine International Convention Center (PICC).
Mo-atindar ang nagkadaiyang sektor sa nasud gikan sa magbabalaud, presidente ug mga magtutudlo sa nagkadaiyang mga unibersidad, mga lider sa mga kabatan-onan ug kababaihan, mga media, ug mga lider sa nagkadaiyang relihiyon ug civil society organizations.
Karong tuiga ang tema sa maong tigom mao ang “Peace Builds One Nation, One Future – Peace is Here.” Gitumong sa pagtukod og usa ka gambalay sa pagkab-ot sa nasudnong panaghiusa pinaagi sa kalinaw nga nahisubay sa agenda sa kasamtangang administrasyon.
Gumikan sa maong tigom, nagpagawas og usa ka resolusyon ang grupo aron ipasaka kang Pangulong Bongbong Marcos para sa posible nga pagdeklara og National Peace Day isip Special Working Holiday.
Gi-organisar usab kini sa pag panguna sa mga Volunteer Individuals for Peace (VIP), usa ka lokal nga organisasyong pangkalinaw pina-agi ni Dr. Ronald Adamat, Commissioner sa Commission on Higher Education (CHED).
Atol sa maong tigom, mo-atindar usab ang usa ka 92 anyos nga lider ug Chairman sa usa ka internasyonal nga organisasyon, Heavenly Culture, World Peace, Restoration of Light (HWPL) nga si Lee Man-hee, usa ka peace advocate ug war veteran gikan sa South Korea. Ana na usab sa ika-siyam ka tuig nga pag sa-ulog isip annibersaryo sa maong kalinaw sa HWPL.
Sa unang adlaw sa iyang pagbisita sa petsa 24 niining bulana mo-atindar ug mohatag og mensahe atol sa seremonyas sa pag abri sa ika-onse nga monumento sa kalinaw nga gitukod sa Plaza Asuncion, Malate, Manila.
Gi-lauman usab nga mohatag og mensahi ang Chairman ug pakigpulong sa unang sesyon sa plenaryo aron ipa-ambit ang mga nahimo sa ilang pagtinabangay alang sa pagtukod og kalinaw sa nasyonal ug internasyonal nga lebel, ingon man ilang mga plano. Si Bise Presidente Sara Duterte gi-imbitar usab sa pagpamulong sa maong sesyon. (PIA-XI/Edith Isidro with reports from HWPL)
