TUGUEGARAO CITY, Cagayan (PIA) - - Sangaw Febrero ay natuturunuk nga art exhibit y navvuka taw nga syudad megafu ta pattakkilala na provinsya na Cagayan ta National Arts Month 2023.

Danaw nga exhibit ira ay nangolluan na Cagayan Museum and Historical Research Center, konsu suporta na Cagayan Tourism Office anna Provincial Government of Cagayan, nga yayya ay nattaraddayan gapa na artist, stakeholders, anna organisasyon ira, kagitta na Cagayano Artists Group, Inc. (CAGI) 

Y ollu ta exhibit ira ay mangagan tu “Bannag” nga nakwa mismu ta Cagayan Museum. Mepalappa taw y obra-maestra ira nga pinadday na pintor nga si Tadeo Baquiran, nga meyannung ta Cagayan River. Meyamung taw ay nevulun gapa ta exhibit yuri obra ira na ana ni Baquiran nga si Mia, anna afu’ na nga si Ninotchka. 

Tumunuk taw ay yuri Agos ng Sining na CAGI, nga yayya ay serye na exhibit ira nga nakwa ta kadakallan nga mall ira na Tuguegarao– SM City, SM City Downtown, anna Robinsons Place. Yuri ganna-gannug nga obra ira nga nepalappa taw nga galerya ira ay uyya gapa nga magatang.

Segun kani Cagayan Museum curator Kevin Niño Baclig, yuri industriya na artes ta Cagayan ay ari laman tu gamu na talento nga uyya nga meparayag ta interu mundo. Yayya ay meyusa gapa nga pappreserva ta kultura anna zininaga na Cagayan, megafu ta danaw ay kanayun nga mepalappa na pintor ira.

Negarantisa gapa ni provincial first lady Atty. Mabel Villarica-Mamba, nga yayya ay nangi-representa kani Gob. Manuel Mamba ta ke-vuka na exhibit ira, y interu suporta na Cagayan provincial government ta lokal nga artista ira. (OTB/JKC/Region 2)