MARAWI CITY, Lanao del Sur (PIA)—Aron matubag ug mahataga’g kasulbaran ang mga panginahanglan sa mga residente nga apektado sa giyera, gibutyag sa bag-ong natukod nga Marawi Compensation Board ang ilang inisyal nga mga plano sa paghimo’g sistema aron paspas ug hapsay ang pagpatuman sa ilang mandato ug misyon.

Si Atty. Maisara Dandamun-Latiph nga maoy nagdumala sa Marawi Compensation Board, miingon nga siya ug ang ubang mga miyembro nagsugod na sa pagtrabaho niadtong Enero 30. Usa ka semana ang milabay, mibalik sila sa Marawi alang sa ilang unang miting, diin ilang gihisgutan ang plano sa gikinahanglang aksyon alang sa sunod nga 90 ka adlaw.

Matud pa niya, ang una nilang buhaton mao ang pagbutang sa Secretariat tungod kay ang balaod nag-ingon nga mao kini ang una nilang atimanon sa ilang paglingkod sa katungdanan.

Dugang ni Latiph nga lakip sa ilang dagkong plano mao ang pagpasa sa Implementing Rules and Regulations kon IRRs nga mahimong epektibo 15 ka adlaw human kini maaprobahan.

Giklaro niya nga naa na silay gipahigayong espesyal nga miting sa kagamhanang probinsiyal sa Lanao del Sur, ug sa kagamhanan sa Marawi City. Ang duha, sumala pa, nagpresentar sa ilang gihimong IRRs, nga gidawat sa Compensating Board isip dugang nga mga pakisayran alang sa unang draft.

Gipasaligan ni Latiph ang mga tawo nga dili mabalaka sa umaabot nga mga panghitabo kay dili sila magsugod sa wala.

Gipaneguro usab niya nga ang lista sa mga lehitimong makadawat ibase sa mga dokumento gikan sa gobyerno.

Lakip sa mga papeles ang gikan sa Task Force Bangon Marawi (TFBM), sama sa Kathanor, social cartography sa Department of Environment and Natural Resources (DENR), ug post-conflict needs assessment report sa Office of Civil Defense (OCD).

Apan giklaro ni Latiph nga bisan og tan-awon pa nila ang listahan sa Kathanor gikan sa TFBM, ang labing importante mao gihapon ang mga aplikasyon sa mga claimant.

Miingon siya nga ang mga aplikasyon magpakita kung ang mga tawo nga nag-angkon nga dunay katungod sa bayad makakuha niini o dili.

Dugang pa ni Latiph nga ang uban wala maapil sa listahan sa Kathanor apan gikonsiderar nga mga katungod sa benepisyaryo; busa, kinahanglan dili sila mapugngan sa pag-file sa ilang aplikasyon.

"Huwag mag-alala na kung wala ka sa Kathanor, hindi kayo masasama dahil hindi iyon totoo," matud pa niya. (APB/PIA-10/Lanao del Sur)