No. of :

No. of Shares:

Currently viewed by: Marcus Rosit

Gov. Castro may tanyag nga trabaho sa magatapos sa kolehiyo

SYUDAD SANG ROXAS, Capiz (PIA) -- Ginapangunahan ni Gobernador Fredenil H. Castro ang pagbisita sa mga ekswelahan sa kolehiyo agud nga mapaabot sa mga magagradwar nga mga estudyante ang trabaho nga ginatan-ay sang isa ka kompanya sang Business Process Outsourcing (BPO) nga magabukas sang "branch" diri sa probinsya sa Hunyo karon nga tuig.

Nahibaluan nga ang Qualfon nga kompanya ang naghingyo sang bulig sang panguluhan probinsyal pinaagi sa Public Service Employment Office (PESO) para sa ginapangita kag kinahanglanon nga mga empleyado.

Kuha nga litrato sang Capiz Provincial Government Communications Group

Ginpahayag sang gobernador nga kapin sa 1,200 ka mga "call center agent" kag mga empleyado ang kinahanglan sang nasambit nga kompanya sa iya pagbisita sa Filamer Christian University kag Hercor College agud nga mapahibalo kag mag-agda sa mga interesado nga magtrabaho sa BPO.

Samtang, nakighinun-anon man si Castro sa mga opisyal sang Capiz State University agud nga hingyuon sa tagdumalahan sang eskwelahan nga magbulig sa pagpangita sang mga estudyante kwalipikado para sa nasambit nga oportunidad sang trabaho.

Subongman, ginpangunahan sang gobernador ang pagtilipon sang kapin 900 ka mga manogtapos sa kolehiyo nga 

estudyante nagikan sa nagkalainlain nga "campuses" sang CapSU agud ipahibalo ang ginatanyag nga trabaho.

Ginpanugyan man ni Castro sa mga estudyante nga magbakas sa pag-eskwela kag magpakita sang maayo nga pamatasan sa masudlan nga trabaho bilang kinaiya sang mga Capiznon ilabi na nga madamo pa sang mga negosyante ang magatukod sang ila negosyo sa probinsya nga magapatimaan sang madamo nga pagkinahanglan sang mga empleyado.

Kaupod sang gobernador sa paglibot sa mga eskwelahan si John Leo Beldia nga manager sang PESO - Capiz kag madamu nga iban pa. (JBG/AAL/PIA Capiz) 

About the Author

Alex Lumaque

Writer

Region 6

Writer :)

Feedback / Comment

Get in touch