Suno kay Provincial Fire Marshal Supt. Patricio G. Collado, ginarekomendar ang EDITH campaign sa tagsa ka panimalay para tudluan ang mga miyembro kang pamilya kang nagakaangay nga tikang para makaguwa dayon sa nagakasunog nga balay.

Dugang pa ni Collado, importante nga maintindihan kang magagmay nga mga kabataan ang mga lihok para sanda magbahol nga may labi nga paghalong kontra sunog.

Ginahinyo man kang opisyal ang publiko nga hindi magpaka-kampante kag maghalong gid sa pagpanigarilyo, pagraha, pagsindi kang kandila, kag iban pa nga mga aktibidad nga nagagamit kang kalayo, amo man sa pagparayo kang mga kabataan sa mga bagay nga dasig masunog.

Kon napalagyo sa nagakasunog nga lugar, mahimo man magdapa kag kamang paguwa kay temporaryo nga mas mayad ang hangin sa idalom bangod sa natural nga pagsaka kang mainit nga hangin.

Dapat man nga ibilin sa mga bombero kag emergency responders ang pagrescue para malikawan ang dugang nga risgo sa kabuhi, kag ginapangabay man nga ipabilin nga matawhay ang mga entrance kag exit sa mga panimalay para madasig ang pag-evacuate.

Ginakalipay man kang BFP ang padayon nga pagpatindog kang San Jose Fire Sub-station sa Robinsons Antique kag ang marapit don nga activation kang Anini-y Municipal Fire Station para sa anda dugang nga kapasidad sa pagpatay kang mga sunog sa probinsya. (AAL/BPS/UA Intern/PIA Antique)