CEBU CITY, Cebu, April 21 (PIA) -- Gihapsay na sa Department of Education Region VII (DepEd-7) ang tanang mga pagpangandam alang sa ipahigayon nga Central Visayas Regional Athletic Association karong tuiga (2023 CVRAA) didto sa Carcar City nga adunay tema nga “School Sports: Developing Talents, Building Character for Resiliency”
Pinaagi sa abag sa host LGU, ang School Division Office sa Carcar City, hugot nga gisiguro sa ahensya ang kaandam sa tanan aron nga malampuson nga mapahigayon ang tanang sports events ug masiguro ang seguridad ug kaluwasan sa tanang mga delegado nga gilangkuban sa mga student-athletes, coaches, technical officials, ug chaperones.
Samtang, nakig-alayon usab ang DepEd-7 sa Carcar City Police Office kung diin magpakatap sila ug mga police personnel ug ubang force multipliers aron sa pagsiguro sa seguridad sa mga venues kung diin ipahigayon ang usa ka semana nga regional sporting event.
Gawas niini, mohatag usab ang kapulisan ug technical services, samtang ang Carcar City Disaster Risk Reduction Management Office (DRRMO) andam usab nga motunol ug mga emergency response services kung diin mag deploy sila ug mga ambulansya og mga first aid responders aron nga masiguro ang luwas ug walay hunong nga pagpahigayon sa maong kalihokan.
Karong tuiga, mibalik ang CVRAA pagkahuman sa tulo ka tuig nga hiatus mahitungod sa Covid-19 pandemic ug ang mga tunghaan sa tibuok Central Visayas labihan nga giatngan ang pagpahigayon niini ug ang pagpasundayag na usab sa mga talento ug abilidad sa mga tinun-an sa nagkalain-laing sporting events.
Pipila sa mga sports events nga lakip sa 2023 CVRAA mao ang Archery. Basketball, Football, Softball, Swimming, Taekwondo, ug Wrestling.
“Actually, our CVRAA is more on sports, but it will also of course develop the total personality of our learners, especially our athletes. (Actually, ang atong CVRAA kay more on sports, pero mo develop pud ni siya sa total personality sa atong mga learners, ilabi na sa atong mga atleta.)" sigon ni DepEd-7 Regional Director Dr. Salustiano Jimenez
“I am happy that we have this activity, and I am hopeful that this activity really will make a difference to not just the lives of our athletes but to everyone. (Nalipay ko nga aduna kita niini nga kalihokan, ug ako naglaum nga kini nga kalihokan makahimo gayud og kalainan dili lamang sa kinabuhi sa atong mga atleta kon dili alang pud sa tanan.)” dugang ni RD Jimenez
Matod sa DepEd, anaa sa 7,929 ang kinatibuk-ang delegado nga naggikan sa 20 ka mga Schools Divisions sa rehiyon ang mosalmot sa CVRAA nga gilangkuban sa 6,525 ka mga atleta, 1,146 ka mga coaches, 147 ka mga assistant coaches, ug 111 ka mga chaperones.
Anaa sa 2,863 ka mga delegado ang gikan sa Elementary level, 4,734 gikan sa Secondary Level, ug 332 ang mo representar sa Special Education.
Ang 2023 CVRAA sugdan karong Abril 24 pinaagi sa usa ka opening parade ceremony ug ang closing ceremony mahitabo sa Abril 28. (RGC/PIA7 Cebu)
