TUGUEGARAO CITY, Cagayan (PIA) - - Namegafu kustu Mayo 16 y istrikto nga implementasyon na No Segregation No Collection Policy na gobyerno na Siyudad na Tuguegarao.

Segun ta Tuguegarao City Information Office, y ngamin nga garbage truck ira ta interu siyudad ay makkolekta laman ta basura nga neumpik segun nu danaw ay biodegradable, residual, onu special waste anna bote ira.

I biodegradable waste, nga mala laman kada Lunes, Mierkules, anna Biernes, ay danuri basura ira nga malabbak anna madaral kagitta na tulu-tulang, upa na frutas anna gulay, tuange ta nevuna nga mak-makan. 

I residual waste gapa nga mala kada Martes anna Hueves laman, ay kagitta na diaper, sanitary napkin, ceramics, electronics, goma, anna kakaruan nga non-recyclable wastes.

Ta sabadu ay makolekta y bote ira anna special waste; awan gapa tu koleksyon nu Liggu. 

Y multa ta violator ira ay maddepende ta kada baranggay, kagitta laman ngana ta Centro 10, nu sitaw meddan labbi ta warning y violator nga magafu ta first offense, 300 pesos para ta mekaduwa nga attagaruli, 500 ta mekatallu, anna non-issuance na Barangay certifcation onu kanselasyon na business permit ta tumunuk ira nga offense. (JKC/PIA-2/report na TCIO)