TAGBILARAN CITY, Bohol, May 25 (PIA) -- Nipagawas og pahayag ang Globe kalabot sa pagkabalda sa ilang serbisyo sa Central ug Eastern Visayas ning bag-o lang.
Niadtong Mayo 24, ang mga linya sa Globe sa Central ug Eastern Visayas naapektuhan sa daghang nangaputol sa ilang fiber, pagkabalda sa serbisyo sa mga kustomer nga naggamit sa Globe Prepaid, Globe Postpaid, Globe Platinum, TM, Globe Business, Globe At Home Prepaid Wifi, Globe At Home Postpaid ug LTE@Home.
Ang maong insidente nahitabo tungod sa mga kalihokan sa konstruksyon nga gikontrata sa gobyerno, nakaapekto sa milyon-milyon nga mga kostumer nga nakasinati og kalisud sa paghimo ug pagdawat sa mga tawag, text, ug pag-browse sa internet.
Ang pagkaputol sa fiber nasubay sa Tagkawayan, Quezon tungod sa mga kalihokan sa Joey Ding Contractor, ug sa syudad sa Tagbilaran sa Bohol, tungod sa construction work sa Cebu 7H Technochem Industries.
Ang mga technical ug network teams sa Globe mitrabaho og double time aron mabalik ang mga serbisyo sa normal.
Ang mga serbisyo gibalik sa tanan nga naapektuhan nga mga lugar sa sayo sa hapon sa mao ra gihapong adlawa.
Kasamtangang nakig-alayon ang Globe sa Department of Public Works and Highways (DPWH), nga nangulo sa mga construction activities sa mga apektadong dapit, aron imbestigahan ang hinungdan sa pagkaputol sa fiber.
Ang Globe mi-apelar sa mga kontraktor nga mag-amping sa mga excavation activities o mga kalihokan sa pagpangubkob ug roadworks isip konsiderasyon sa mga linya sa utility nga mahimong maapektuhan, tungod kay ang wala tuyoa nga pagputol hinungdan sa mga pagkabalda sa serbisyo nga nakaapekto sa mga kustomer ug miresulta sa mahal nga pagpa-ayo. (ECB/PIA7 Bohol)
