BAGUIO CITY (PIA) -- "We should not talk immediately to the rift without looking into the condition of the ridge." Ito ang binigyang-diin ni Department of Environment and Natural Resources - Cordillera Regional Director Ralph Pablo kaugnay sa plano ng ahensiya na gumamit ng  "natural resources accounting" sa mga serbisyong ibinibigay ng Cordillera sa mga karatig na rehiyon.
 
Ayon kay Pablo, bilang Watershed Cradle of North Luzon, ang Cordillera ang host ng mga major rivers na nagbibigay ng tuloy-tuloy na suplay ng tubig para sa irigasyon at enerhiya para sa Regions 1, 2, at 3.

"The very purpose of that why kinost namin na ganyan especially on the water asset accounting, so nako-compute 'yung volume ng tubig na bumababa sa kanila and we are gearing towards that move na dapat merong payment of the services that we are giving," ani Pablo.
 
Binanggit nito ang sitwasyon sa Magat Dam sa Isabela kung saan, ang tubig nito ay galing ng Lower Agno River sa Nueva Vizcaya. Aniya, ang Magat management ay nagbabayad upang mapanatili at mapangalagaan ang watershed na nagsusuplay sa kanila ng tubig. Ito rin aniya ang nais nilang mangyari para sa rehiyon.

Ani Pablo, napag-usapan na rin sa Regional Development Council "kung paano magsingil para sa mga resources na ginagamit ng mga kalapit na rehiyon."
 
"Kung hindi natin i-maintain 'yung watershed natin dito, siyempre, maaapektuhan 'yung baba. If we will not clean our rivers, definitely, madumi 'yung bababa," giit ni Pablo.
 
Aniya, nais nila na madagdagan ang national allotment para sa pangangalaga sa mga watershed sa Cordillera na "triple sa pondo sa low-lying areas para magampanan ang mga dapat gampanan".
 
Binanggit naman nito na isinusulong din ng kalihim ng DENR ang natural resources accounting upang ma-account lahat ng resources at magkaroon ng costing na magiging basehan ng kokolektahin mula sa mga serbisyo na ibinibigay sa kalapit na mga komunidad.
 
Kabilang sa mga major rivers sa Cordillera na dumadaloy papunta sa ibang bahagi ng Hilagang Luzon ang Abra River, Silag River, Amburayan River, Naguilian River, Aringay River, Bued River, Cabicungan River, Zumigui-Ziwanan, Apayao-Abulog, Chico River, Siffu-Mallig River, Magat River, at Agno River. (DEG/PIA CAR)