DAVAO CITY (PIA) -- Sa umaabot nga Hunyo 7, 2023 pagasaulugon ang Migrant Workers’ Day sa pakig-alayon sa Department of Migrant Workers XI (DMW XI) ug Overseas Workers Welfare Administration (OWWA) - Regional Welfare Office XI sa SM Annex Activity Area, Ecoland, Davao City.
Matud pa ni OWWA XI Regional Director Carmelo Elaya nga ang tinuig nga selebrasyon subay sa RA 8042 o Migrant Workers and Overseas Filipino Act of 1995.
Tumong niini mao ang paghatag og pasidungog sa mga bililhong kontribusyon sa mga Overseas Filipino Workers (OFW) sa nasudnong ekonomiya, ingon man usa usab kini ka venue aron mapalambo ang panaghigalaay sa mga myembro sa OFWs Family Circles nga gikan sa nagkadaiyang barangay sa Davao City.
Ang tema sa maong selebrasyon mao ang “OFWs: Saan Mang Panig ng Mundo, Galing at Katatagan Mo’y Hinahangaan;” gilaumang anaa sa 500 ka mga OFW gikan sa Davao City ug mga duol nga probinsya ang mosalmot
Kini gibutyag ni Elaya atol sa Kapihan sa PIA nga gipahigayon sa NCCC Mall Victoria Plaza kaniadtong Hunyo 2.
Pipila sa mga i-highlight atol sa maong selebrasyon mao ang paghatag og tseke ngadtu sa mga benepisyaryo sa programang Balik Pinas! Balik Hanapbuhay, Notice of Award ngadtu sa mga scholarship grantee sa OWWA, ug paghatag og pasidungog sa mga outstanding scholar sa tuig 2023.
Ang bag-ong mugna nga ahensya, ang Department of Migrant Workers (DMW), mo hatag sa ilang mga serbisyo ug programa samtang ang Department of Tourism (DOT) mohanyag sa programang “Bisita: Be My Guest.”
Nanghinaot si Elaya nga mosalmot ug muhatag og mensahi si Mayor Sebastian Duterte ingon man si OWWA Administrator Arnel Ignacio sa maong selebrasyon sa Davao City. (ETI with reports from OWWA XI/PIA XI)
