CAMIGUIN (PIA)—Aron madani ang mga tawo nga mobisita sa isla ug mapalambo ang mas himsog nga palibot alang sa tanan, ang kagamhanang probinsyal dinhi gipahingusgan ang solid waste management ug monitoring sa tanang barangay.
Sa ilang ikaduhang quarter meeting, Hunyo 9, ang Provincial Solid Waste Management Board mitaho nga 100% sa 57 ka barangay sa lima ka lungsod dinhi adunay material recovery facility (MRF), apan 98.21% lang ang functional. Busa, gidasig pag-ayo sa kagamhanang probinsiyal ang mga lider sa barangay sa hingpit nga paggamit sa ilang mga pasilidad.
Si Nykolsha Closas Rayos, provincial planning officer, midugang usab nga 86% lang sa mga barangay ang adunay sorters, ug hugot pa silang nakig-coordinate sa walo ka barangay nga kinahanglan pa nga adunay ilang sorters. Sa bahin sa trabahante, 12% ra sa mga barangay ang adunay driver, ug 87.7% adunay enforcer.
Gitaho usab sa planning officer nga 26.3% sa 57 ka barangay ang adunay mga compost pit ug 12.3% lang ang adunay mga sakyanan sa pagkolekta sa basura.
Para sa mga munisipyo, 60% ang adunay sentral nga MRF, samtang usa lang ka lungsod ang nakakuha og septic truck ingon man usa ka communal compost pit.
"Only Mambajao and Mahinog have a pyrolysis gasification machine, and only Mambajao has a functional plastic shredder (ang Mambajao ug Mahinog ra ang adunay pyrolysis gasification machine, ug ang Mambajao ra ang adunay functional plastic shredder)," dugang ni Rayos.
Karong tuiga, ang lima ka munisipyo sa probinsya migahin ug P10.9 milyones alang sa ilang solid waste management projects, programa, aktibidad, ug serbisyo.
Base sa mga report nga gisumitir sa probinsiya, ang kagamhanang probinsiyal nirekomendar sa pagmugna ug team nga mumonitor ug magtimbang-timbang sa implementasyon sa solid waste management plan ug mga ordinansa, paghatag og kapasidad sa mga barangay officials sa ilang mga tahas ug gimbuhaton, pag-establisar og communal compost pit sa mga barangay, i-rehabilitate ang mga MRF, ug ipahigayon ang regular nga water sampling o testing.
Sa ilang bahin, ang Provincial Environment and Natural Resources Office (PENRO) nagpahinumdom sa mga residente nga hingpit nga tumanon ang "no open burning" nga palisiya, magsagop sa usa ug yano nga pamaagi sa paglainlain, ug maghimo usa ka kasabutan sa mga lokal nga gobyerno sa munisipyo sa paghakot ug katugbang nga bayronon nga ibayad. (RTP/PIA-10/Camiguin)
